Kryetari i Kuvendit të Maqedonisë së Veriut, Afrim Gashi, ka folur në një deklaratë për mediat këtë të martë, më 14 prill, pasi mori pjesë në Samitin IV të Diasporës që po zhvillohet në Tiranë.
Gjatë fjalës së tij, Gashi theksoi rëndësinë e zyrtarizimit të gjuhës shqipe. “Shqiptarët në Maqedoninë e Veriut kanë aspirata që gjuha shqipte të jetë zyrtare dhe e barabartë, por ligjet aktuale në fuqi nuk e mundësojnë këtë.“
Por ai theksoi se nuk duhet politizuar çështja.
“Besoj që po, mendoj që sa më shumë që ne e depolitizojmë çështjen e gjuhës shqipe, aq më shumë do arrijmë te zyrtarizimi i saj. Që gjuha shqipe të jetë e barabartë me atë maqedonase askujt nuk i bën dëm, është në interrs të Republikës së Shqipërisë dhe të gjithë qytetarëve.”, tha Gashi.
Ai iu përgjigj edhe kritikave që ka marrë, për mosprezencën e tij në protestën e zhvilluar në Shkup nga të rinjtë shqiptarë.
“Unë kam qenë në komunikim të vazhdueshëm me studentët, ndoshta i pari, u kam dhënë përkrahje maksimale. Arsyeja pse s’kam qenë është sepse nuk dua të politizohet protesta. Nuk ka shqiptar në RMV që nuk do të zyrtarizohet gjuha shqiptare”, iu përgjigj Gashi gazetarëve.
Ai shtoi se autoritetet qeveritare kanë konfirmuar se është ngritur grupi i punës për t’u marrë me këtë çështje.
Maqedonia e Veriut ka rreth 2 milionë banorë, ku 54% janë maqedonas, 29% shqiptarë dhe pjesa tjetër i përkasin komuniteteve më të vogla. Përdorimi i gjuhës shqipe është rregulluar më parë edhe me ligje të tjera, përfshirë një të vitit 2008, i cili, sipas ekspertëve të drejtësisë, kishte një interpretim të kufizuar të përdorimit të saj. Studentët shqiptarë në Shkup protestuan më herët këtë muaj, duke kërkuar që provimi i jurisprudencës të mbahet edhe në gjuhën shqipe.
