Presidenti i Kinës Xi Jinping u takua sot në Pekin me Kryeministrin e Spanjës Pedro Sánchez Pérez-Castejón.
Xi Jinping theksoi se pavarësisht situatës ndërkombëtare komplekse dhe të paqëndrueshme, marrëdhëniet midis Kinës dhe Spanjës janë zhvilluar gjithmonë në mënyrë të qëndrueshme, duke krijuar një marrëdhënie me vendosmëri strategjike. Faktet kanë vërtetuar se thellimi i bashkëpunimit është në interes të popujve të të dy vendeve, përputhet me trendin e kohës dhe rrit forcën dhe besimin e të dyja palëve për të ndjekur rrugën e pavarësisë dhe të vetëmjaftueshmërisë.
Të dyja palët duhet ta vendosin gjithmonë zhvillimin e marrëdhënieve Kinë-Spanjë në një vend të rëndësishëm në politikat e jashtme të njëra-tjetrës, si dhe të mbështesin njëra-tjetrën në mbrojtjen e sovranitetit kombëtar dhe integritetit territorial.
Të dyja palët duhet të shfrytëzojnë mundësitë, të ndjekin së bashku zhvillimin inovativ, të forcojnë bashkëpunimin në tregti, energjinë e re dhe ekonominë inteligjente, të inkurajojnë shkëmbimet kulturore, arsimore, kërkimore shkencore dhe sportive, si dhe të promovojnë partneritetin gjithëpërfshirës strategjik midis dy vendeve, për të arritur rezultate më të mëdha dhe për të sjellë më shumë përfitime për popujt e dy vendeve.
Pedro Sánchez Pérez-Castejón deklaroi se ai ka bërë katër vizita në Kinë gjatë katër viteve të fundit, të cilat pasqyrojnë rëndësinë e madhe që të dyja palët u japin marrëdhënieve Spanjë-Kinë.
Investimet dhe bashkëpunimi kinez në Spanjë, kanë nxitur ndjeshëm zhvillimin ekonomik të vendit. Spanja i përmbahet fort parimit të një Kine të vetme, vlerëson shumë statusin e Kinës si një fuqi e madhe dhe është e përkushtuar për të zhvilluar një partneritet strategjikisht të shëndoshë Spanjë-Kinë.
Spanja mbështet në mënyrë aktive katër iniciativat globale të propozuara nga Presidenti Xi Jinping. Vendi është i gatshëm të ruajë komunikim dhe bashkëpunim të ngushtë me Kinën, për të adresuar së bashku sfidat në gjeopolitikën ndërkombëtare, proteksionizmin tregtar dhe ndryshimet klimatike, si dhe për të mbështetur të drejtën ndërkombëtare dhe multilateralizmin. Spanja kundërshton një “Luftë të re të Ftohtë” dhe “shkëputjen”.
