Nga ARTUR AJAZI
Në rast se do të nxirrnim nga arkivi ç’ka është thënë, kurdisur dhe deklaruar para dhe gjatë fushatave elektorale në vite nga ish-drejtuesi i Partisë Demokratike dhe drejtuesit aktualë që nuk janë gjë tjetër veç zgjatuesit e tij, do të dilnim në përfundimin, se në atë forcë politike dominojnë teorikisht dhe praktikisht ish-komunistët, ish-sigurimsat dhe bijtë e tyre. Mjafton të merresh paksa me ish-kryetarin e saj, 25 vjet komunist, ish-nënkryetarët me familjarë të cilët kanë qenë ish-anëtarë të PPSH, ish-deputetët dhe ata që ishin të tillë deri para “djegies” së mandateve, të gjithë ish-anëtarë dhe bij të ish-komunistëve, njerëz të afërt me ish-sigurimsa të asaj periudhe. Kjo ishte dhe mbetet edhe sot, Partia Demokratike. Por edhe pse është e tillë, edhe pse ka kaq mëkate dhe krime të kryera në periudhën kur ka qenë në pushtet, sërish ajo rreket dhe akuzon Edi Ramën si “diktator”. Për të qeshur dhe gajasur gjithë dynjanë. Një ish-komunist, një tjetër bir dhe vëlla i ish-komunistit apo sigurimsit, apo dhe njerëz të afërt me ish-ministrat e diktaturës, kanë 8 vjet që akuzojnë kryeministrin dhe ministrat e tij si “bllokmenët e rinj, si neokomunistë” etj, budalliqe të tilla. Edhe pse jemi në 2021, edhe pse shqiptarët e dinë mirë se kush ka drejtuar dhe qeverisur vendin më shumë në këto 30 vjet tranzicion, sërish dëgjojmë nga frëngjitë e Partisë Demokratike, teoritë e vjetra dhe të leckosura të ish-komunistit, që u bë president dhe kryeministër, e njeriut që nuk la kundërshtar të tij në atë parti, pa rrahur, pa denigruar, pa përzënë nga vendi me dhunë verbale dhe fizike, duke i hapur rrugën një neodiktature të rrezikshme, e cila u përmbys me votë nga shumica e popullit. Edhe pse kanë kaluar afro 3 dekada që vendi ka hyrë në rrugën pakthim të demokratizimit dhe reformave civilizuese, duke synuar anëtarësimin e shpejtë në BE, akrepat e sahatit në SHQUP, kanë mbetur në teoritë manipulatore të ish-komunistëve që drejtojnë akoma me fanatizëm partinë sikur ta kishin pronë private. Gjithkush në Partinë Demokratike,në partinë e ish-komunistëve dhe ish-bashkëpunëtorëve të Sigurimit të Shtetit, është “klonuar” politikisht dhe bërë si udhëheqësi shpirtëror. Fantazma e tyre, janë kryeministri dhe ministrat, janë deputetët, janë investimet, janë arritjet dhe sukseset e kësaj qeverie, fantazma e tyre janë investitorët e huaj që shkelin Rinasin dhe kërkojnë të ndërtojnë dhe hedhin milionat e tyre në ekonomi, industri, turizëm, detari, etj. Ata nuk janë mësuar me metodologjinë e punës së kryer, por me lirinë e korrupsionit të shfrenuar dhe të pandëshkuar. Sa “diktator” është Edi Rama e dinë tanimë shqiptarët, e mësuan tek panë dhunën barbare të “protestuesve paqësorë” në protestat e Partisë Demokratike, e panë tek djegia e institucioneve dhe plagosjet e policëve, akte të cilat në rast se do të kishin ndodhur në SHBA apo gjetkë, do të kishim parë shumë viktima dhe të arrestuar. Por propoganda e “demokratikasve” të PD, ka qenë dhe mbetet mëshirimi i vërtetë i asaj, ç’ka kanë përfaqësuar dhe përfaqësojnë edhe sot drejtuesit aktualë.Një kastë njerëzish që qeverisën me mashtrime, të damkosur si hijena zhvatëse, që edhe në kohë opozite apo kohë pandemie veçse pasurohen, një grupim dështakësh që nuk rreshtin së mallkuari gjithçka të gjallë dhe të bukur, nuk rreshtin së penguari çdo filiz që nis të marrë jetë në këtë vend, duke tentuar të shpërfytyrojnë cilindo që nuk i mbështet ata në misionin e tyre si humbës të përjetshëm. Të mësuar në partinë e tyre me ritmin dëshirat dhe diktatin e udhëheqësit, ata kanë shtruar kurrizin para tij, ata janë kthyer në kavie të tij, ndërkohë që Ramën e shohin me zili nga vetëm nga ekranet si “diktator”.
