Një prej mbështetësve publik të Lulzim Bashës, analisti Agron Gjekmarkaj, ka ironizuar opozitën që është duke bërë numri një i Partisë Demokratike në bashkëpunim me deputetin e ri të parlamentit Tritan Shehu.
Në një analizë të tijën, Gjekmarkaj shkruan se “e vetmja mënyrë që të bëjë njeriu prokopi në PD-në e re është të lexosh e studiosh jetën, veprën dhe mendimin e Aldo Bumçit, Grida Dumës, Eduard Halimit, e Tritan Shehut dhe pastaj të dalësh në provim para Jeminit!”.
Agron Gjekmarkaj ka qenë për një kohë të gjatë një nga mbështetësit e politikave të Lulzim Bashës. Ai madje i vuri “gjoksin” edhe kauzës së çadrës.
Por fillimisht mënyra se si Basha doli prej andej, marrëveshja me Ramën, hartimi i listave dhe se fundi humbja katastrofale me 200 mijë vota e kanë shëndruar atë nga një mbështetës në një kritik.
Pjesë nga analiza
“Në pikë të këtij gazepi, Lulzim Basha dhe Tritan Shehu po bëjnë alamet opozite. Ke qejf t’i dëgjosh qerratenjët! Bie fjala si gjyle topi mbi qemerin e padrejtësive.
Veç të shtënat nga kryqëzori Aurora në filmin e Ezejnshtejnit të krijojnë një të tillë tension të brendshëm.
Pas rezultatit mbresëlënës të 25 qershorit dhe 22 korrikut, djalëria shqiptare, neoshqiptarizma, të virtytshmit dhe idealistet me fjalën e tyre e bëjnë litar shpresën.
Në një breg ku kam hedhur një çadër për të kërkuar hije e puhizë, pasi “zgjedhjet e lira” vanë, dhe nga ku po nomatis këto radhë plot brengë e mall, një demokrat i kalitur betejash m’u afrua pa shumë kortezi e më tha: “E more evlat si erdhën kohët, e vetmja mënyrë që të bëjë njeriu prokopi në PD-në e re është të lexosh e studiosh jetën, veprën dhe mendimin e Aldo Bumçit, Grida Dumës, Eduard Halimit, e Tritan Shehut dhe pastaj të dalësh në provim para Jeminit!” shkruan Gjekmarkaj.
