Irani ka deklaruar se është duke përgatitur “karta të reja” për t’i përdorur në fushën e betejës, ndërsa afati i një armëpushimi të shpallur mes SHBA-së dhe Izraelit me Iranin po afrohet drejt përfundimit, pa shenja të qarta për përparim në bisedimet e paqes.
Kryetari i parlamentit iranian, përmes një postimi në platformën X, theksoi se vendi është “përgatitur të tregojë karta të reja në fushën e betejës” gjatë dy javëve të fundit, duke shtuar se Irani “nuk do të pranonte negociata nën hijen e kërcënimeve”.
Nga ana tjetër, presidenti amerikan Donald Trump ka mohuar se ndodhet nën presion për të arritur një marrëveshje, ndërsa raportime nga mediat amerikane sugjerojnë se zëvendëspresidenti JD Vance pritet të udhëtojë drejt Pakistanit për bisedime diplomatike. Trump ka shtuar gjithashtu se është “shumë e pamundur” që armëpushimi dyjavor mes SHBA-së dhe Iranit, i cili skadon të mërkurën, të zgjatet.
Në terren, tensionet mbeten të larta. Në Gjirin Persik, SHBA-të vijojnë bllokadën në Ngushticën e Hormuzit, pasi sekuestruan një anije mallrash me flamur iranian gjatë fundjavës. Të dyja palët kanë akuzuar njëra-tjetrën për shkelje të armëpushimit.
Ndërkohë, zhvillime të tjera diplomatike priten në rajon, sipas një zyrtari amerikan, një raund i dytë bisedimesh mes Izraelit dhe Libanit është planifikuar të mbahet të enjten.
