Sektori postar i Kinës ka pësuar përmirësime thelbësore në dekadën e fundit, duke thjeshtuar jetën e njerëzve me komoditet më të madh dhe efikasitet më të lartë.
Personat që punojnë apo studiojnë larg shtëpisë mund të shijojnë ushqimet e zonës, pasi janë bërë përmirësime drastike në logjistikën e zinxhirit të ftohtë për ushqimin e freskët, efikasitetin e dërgesës si dhe produktivitetin e fabrikës.
Statistikat tregojnë se gjatë 10 viteve të fundit, të ardhurat nga biznesi i sektorit u rritën nga 198.09 miliardë juanë (rreth 27.9 miliardë dollarë amerikanë) në më shumë se 1.26 trilionë juanë, me një normë mesatare vjetore rritjeje prej 22.9 për qind.
Zgjerimi i rrjetit postar në mbarë vendin kontribuoi pjesërisht në këtë rritje të jashtëzakonshme, shkruan “Xinhua”.
Dhjetë vjet më parë, shumë fshatra në rajonin perëndimor të Kinës nuk kishin akses të drejtpërdrejtë në shërbimet postare. Shumica tyre janë në zona malore dhe shkretëtira me lartësi të madhe, të cilat janë pak të populluara, të papërshtatshme për transport dhe të prirura ndaj fatkeqësive natyrore.
Për të lidhur fshatrat e largët, Kina ka rritur përpjekjet duke zgjeruar rrugët e saj postare dhe duke krijuar zyra postare në zona të largëta.
Deri më sot, gjatësia e rrugëve postare të Kinës ka tejkaluar 10 milionë km. Shërbimet postare kishin mbuluar të gjitha fshatrat administrative të vendit deri në fund të periudhës së Planit të 13-të Pesëvjeçar (2016-2020), duke hedhur themelet për luftën e vendit kundër varfërisë dhe ndjekjen e rivitalizimit rural.
Rrjeti i përmirësuar postar lehtësoi gjithashtu bumin e tregut të dërgesave ekspres në Kinë. Gjatë dekadës së fundit, vëllimi vjetor i dërgesave ekspres në Kinë u rrit nga 5.7 miliardë në 108.3 miliardë pako, duke u renditur i pari në botë për tetë vjet rresht.
Rritja e sektorit postar të Kinës në 10 vitet e fundit erdhi gjithashtu me një “revolucion të gjelbër”, i cili synoi të zbusë ndikimin mjedisor të mbetjeve të paketimit dhe të reduktojë përdorimin e kutive të kartonit për të ulur emetimet e karbonit.
Autoritetet kineze kanë hartuar plane dhe udhëzime të shumta për të promovuar përdorimin e faturave elektronike, qeseve dhe mbushjeve të ambalazheve miqësore me mjedisin, reduktimin e përdorimit të shiritit ngjitës dhe përmirësimin e riciklimit dhe menaxhimit të mbetjeve të paketimit.
Deri në fund të vitit 2020, përdorimi i faturave elektronike në thelb kishte arritur mbulim të plotë në sektorin postar dhe më shumë se 70 për qind të dërgesave të tregtisë elektronike nuk kishin përdorur paketim dytësor.
