Tregtia e jashtme ka shfaqur dobësi këtë vit si nga ana e importeve dhe eksporteve. Në fund të 11 mujorit 2015 importet e mallrave shënuan një rënie vjetore me 1,4%.
Sipas të dhënave të INSTAT ndikimin më të madh në këtë rënie e kanë dhënë importet e mineraleve dhe energjisë elektrike të cilat ishin 33.6 për qind më të ulta se e njëjta periudhë e vitit 2014. Rritja e prodhimit vendas të energjisë ka ulur nevojën për importe të energjisë, duke u shndërruar në arsyen kryesore të uljes totale të importeve.
Rënie të fortë kanë shënuar edhe importet e materialeve të ndërtimit që pësuan tkurrje vjetore 4.1 për qind në janar-nëntor. Po në këtë masë kanë pësuar rënie edhe importet e drurit dhe të letrës.
Nga ana tjetër rritje e fortë është vënë re në importet e makinerive dhe pajisjeve me 12 për qind krahasuar me 11 –mujorin e 2014, si rezultat i zhvillimit te projekteve te gazsjellësit TAP dhe HEC-eve në lumin Devoll.
Gjithashtu rritje dyshifrore kanë pësuar edhe importet e lëkurës me rreth 12 për qind çka është një sinjal se industria e prodhimit të këpucës do të vijë në rritje.
Në muajin nëntor 2015 importet arritën vlerën 49 mld lekë, duke u rritur me 1,7 % në krahasim me Nëntor 2014 dhe duke u ulur me 2,7 % në krahasim me tetor 2015.
Rritja vjetore e importeve prej 1,7 % këtë muaj është ndikuar kryesisht nga grupet: “Makineri, pajisje dhe pjesë këmbimi” me +4,5 pikë përqindje, “Tekstile dhe këpucë” me +2,4 pikë përqindje, “Lëkurë dhe artikuj prej tyre” me +0,5 pikë përqindje. Në ndryshimin vjetor të importeve kanë ndikuar negativisht grupet: “Materiale ndërtimi dhe metale” me -2,9 pikë përqindje, “Minerale, lëndë djegëse, energji elektrike” me -2,9 pikë përqindje, “Produkte kimike dhe plastike” me -0,4 pikë përqindje.
MONITOR
