Deputeti i përjashtuar nga Partia Socialiste Tom Doshi ka sërish probleme me drejtësinë, dhe këtë herë i duhet të japë llogari përpara organeve përkatëse se si u bë i pasur. Është Inspektoriati i Lartë i Deklarimit dhe Kontrollit të Pasurisë që ka bërë kallëzim për deputetin Doshi, pasi nga kontrollet e kryera rezulton të ketë një pasuri prej rreth 23 milionë eurosh të padeklaruara.
Siç thekson ILDKPKI nga verfikimet dhe kontrollet e ushtruara ndaj Doshit për periudhën 2005-2014 rezuton të ketë fshehur një pasuri marramendëse prej 14 milionë eurosh, ndërsa 9 milionë euro të tjera rezultojnë me kontrata fiktive pasurish, transferta bankare të dyshimta e pa burime të ligjshme financiare dhe dyshime për pastrim parash, brenda dhe jashtë vendit.
Por kjo nuk është hera e parë që ILDKPKI evidenton Doshin me shkelje pasi në kontrollet e ushtruara nga 2005-2013, deputeti është evidentuar me shkelje të rënda të ligjeve dhe konflikteve të interesit. Por pavarësisht kësaj, ky institucion i ka mbajtur të fshehura informacionet, duke mos ia dorëzuar ato organit të akuzës.
Ndaj deputetit Doshi në Gjykatën e Lartë është duke u trajtuar edhe një çështje tjetër që ka lidhje me atentatin e pretenduar nga ai, ku akuzohet së bashku me deputetin tjetër Mark Frroku nga Prokuroria për kallëzim të rremë dhe dëshmi të rreme.
Lidhur me këtë akuzë, Doshi qëndroi për një muaj nën arrest shtëpie, ndërsa më 28 prill Gjykata e Lartë vendosi masën e sigurisë detyrim paraqitje.
Më poshtë komunikata e plotë e ILDKPKI:
Inspektorati i Lartë i Deklarimit dhe Kontrollit të Pasurive dhe Konfliktit të Interesave, bazuar në ligjin nr. 9049, datë 10.4.2003 “Për deklarimin dhe kontrollin e pasurive, të detyrimeve financiare të të zgjedhurve dhe të disa nëpunësve publike”, i ndryshuar, përfundoi kontrollin dhe rikontrollin e plotë të deklaratave të interesave private të subjektit Tom Doshi, me funksion Deputet i Kuvendit të Shqiperisë, për periudhën kohore 2005 – 2014, nga ku rezultuan fshehje të pasurive, deklarime të rreme, për pasuritë në shumën rreth 14.000.000 euro, kontrata fiktive pasurish, transferta bankare të dyshimta e pa burime të ligjshme financiare dhe dyshime për pastrim parash, brenda dhe jashtë vendit, në shumën rreth 9.000.000 euro.
ILDKPKI bën me dije se subjekti Tom Doshi është kontrolluar nga 2005 deri 2013 disa herë, por, edhe pse në kontrollet e kaluara Inspektorët e çështjes kanë evidentuar shkelje të ligjeve dhe konflikte interesi dhe kanë propozuar zgjidhjet sipas ligjit, drejtuesit e ILDKPKI-së i kanë mbajtur ato të fshehura, duke mos i dërguar dosjet në organin e Prokurorisë, ashtu siç përcaktohet në ligjet bazë të ILDKPKI.
ILDKPKI ka dërguar kallëzimin penal në Prokurorinë e Përgjithshme për veprat penale të parashikuara nga nenet 257a//2 dhe 287 të Kodit Penal, duke insistuar që hetimet paraprake të shtrihen më tej, me qëllim për të zbuluar nëse ndodhemi edhe para veprave të tjera penale.
