Meldoniumi, ilaçi anti-iskemik që ka hyrë në listën e WADA-s (Agjencia Botërore Anti-Doping) më 1 janar, duket se është kufiri i ri i dpoingut. Meldoniumi prodhohet në Letoni dhe përdoret vetëm në vendet ish-sovjetike, ndërsa në sportin perëndimor nuk është dëgjuar kurrë. Sergei Iliukov, mjek sportiv në qendrën e mjekësisë sportive të qytetit finlandez Kuopio, e quan si një komplot perëndimor. “Në Perëndim shohin që sportistët rusë marrin diçka, por nuk e dinë se çfarë është, kështu që duhet të jetë patjetër doping. Ky është mentalitet i luftës së ftohtë dhe nëse kërkimet për këtë ilaç do të ishin botuar në revistat perëndimore nuk do të kishte pasur asnjë problem”.
Por, vetë kompania prodhuese e ilaçit ka bërë të ditur se përdorimi normal i tij shkon nga katër në gjashtë javë, jo dhjetë vjet, siç tha Maria Sharapova në konferencën për shtyp të së hënës, ku bëri të ditur se kishte rezultuar pozitive në testin anti-doping. Shpikësi i meldoniumit, Ivar Kalninsh, nuk ka ndërmend të kërkojë shpjegime nga WADA se pse ilaçi i tij ka hyrë në “listën e zezë”. “WADA nuk kërkon prova, thjesht merr vendime”, thotë ai për agjencinë ruse TASS. “Mendoj se në një farë mënyrë iu drejtohet sportistëve të tjerë lindorë. WADA nuk ka asnjë provë shkencore që meldoniumi është doping”.
Paralajmërimi – “Na presin zhvillime të reja për këtë ilaç. Nuk më takon mua ta them, por do të ketë raste të tjera, për kënaqësinë e miqve tanë”, është komenti sarkastik i ministrit rus të sporteve, Vitalij Mutko, në lidhje me përdërimin e meldoniumit. “Nuk është sistem, do të hetojmë për çdo rast më vete. Gjashtë muaj më parë, lajmëruam të gjitha federatat që ky ilaç ishte përfshirë në listën e atyre të ndaluar. Por duhet transparencë për këto gjëra: sportisti nuk i merr vetë. Mjekët, trajnerët, fizioterapistët dhe krerët e federatave duhet të jenë të përgjegjshëm. Gjëja më e tmerrshme është që në fund e paguan sportisti”.
Efektet – Meldoniumi është një ilaç me kosto modeste, në treg që në vitet ’80 në ish-Bashkimin Sovjetik, por edhe në vende të tjera, por jo në perëndim. Prodhohet nga kompania letoneze
Grindex. Ai përdorete si anti-iskemik, por edhe ndryshon metabolizmin, ul vlerat e hemoglobinës, duke përmirësuar qarkullimin e gjakut. Efektet te sportistët janë ende objekt studimi, por pasi shumë analiza në Rusi evidentuan përdorimin e tij, testet në laboratorin e Këlnit sollën në përfshirjen e produktit në listën e ilaçeve të ndaluar. “Përdorimi i tij – shkruan laboratori gjerman në një publikim shkencor, ku u bazua WADA për vendimin – shfaq rritje të rezistencës së sportistëve, ndihmon riaftësimin pas ushtrimeve, mbron nga stresi dhe përmirëson funksionimin e sistemit qendror nervor”. Motivi të mjaftueshme për ta ndaluar nga ana e agjencisë anti-doping.
