Shqiptarët s’mund të lahen më dot aty. “Siptarska plaza” (që është edhe termi pezhorativ për Plazhin e shqiptarëve v.j.) është disa qindra metra larg pendës së Ujmanit, liqenit artificial më të madh në Kosovë. Atë vend prej 16 vjetësh nuk e vizitojnë shqiptarët, por emrin e ka trashëguar nga më parë, kur atë e kanë frekuentuar kryesisht shqiptarët.
Ky plazh i improvizuar është njëri nga atraksionet e shumta që të ofron Liqeni i Ujmanit, i cili gjendet në veri të vendit. Tani “Plazhi i shqiptarëve” është destinacion vetëm i serbëve, që jetojnë kryesisht në pjesën veriore të Kosovës, shkruan “Koha Ditore”. Koha e ndryshueshme ka bërë që plazhi të mos ketë shumë vizitorë. “Emri ‘Siptarska plaza’ i ka mbetur, sepse kur është shfrytëzuar para luftës ka pasur më shumë shqiptarë.
