Ish-ministri dhe deputeti demokrat, Halim Kosova nuk pranoi të kandidojë për president të Republikës. Në një intervistë për një media, ai shprehu falënderime për deputetët e selisë blu që propozuan emrin e tij ndër 7 kandidaturat për kryetar shteti. Por, për të fokusi kryesor është ndihma e familjeve në nevojë nëpërmjet fondacionit të tij “Petal”.
“Me thënë të drejtën jam njohur nga mediat. Puna ime, eksperienca ime dhe fakti që kam hapur një fondacion për njerëzit në nevojë, më duket më e vlefshme. Unë falënderoj çdo njeri që e ka propozuar , por e kam deklaruar që dua të përqendrohem në profesionin tim dhe kryesisht në ndihmën e familjeve në nevojë. Ky do të jetë prioriteti im”, ka thënë më tej Kosova”, deklaroi fillimisht ish-ministri demokrat.
Për sa i përket 6 emrave të tjerë të propozuar nga PD zyrtare për president, Kosova nuk pranoi t’i komentonte, por shtoi se procesi i zgjedhjes së pasuesit të Ilir Metës duhet të jetë serioz.
“Nuk jam ndalur për të bërë një analizë në veçanti, është një pozicion i rëndësishëm dhe jam dakord që të mos kthehet në një proces qesharak, por të jetë serioz që ky post të jetë serioz”, vazhdoi më tej Kosova. Lidhur me profilin e drejtuesit të ri të Republikës së Shqipërisë, mjeku i njohur nënvizoi se duhet të jetë një figurë e pastër dhe me dinjitet. Ai nuk u shpreh kundër zgjedhjes së një gruaje si presidente e Shqipërisë. “Mjafton të jetë njeri me dinjitet dhe figurë e pastër. Shqipëria ke nevojë për figura të pastra. Presidente femër? Absolutisht dakord”, përfundoi ish-ministri i Shëndetësisë, Halim Kosova.
/a.r
