Elseid Hysaj është një prej lojtarëve që kanë shkëlqyer në fazën e parë të Serisë A italiane. Kampion dimri me Napolin, por me synimin madhor për të fituar titullin në fund të sezonit, duke u bërë shqiptari i parë që ngre trofeun, pas Naim Kryeziut në sezonin 1941-’42 me Romën. Në lidhje telefonike për “Supersport”, mbrojtësi kërkon qetësi dhe qëndron me këmbë në tokë. “S’e kam ditur që ishim shpallur kampionë dimri, por vetëm kur e dëgjova në lajme. Thjesht kam parë që ishim në vend të parë. Të jesh kampion dimri nuk ka shumë rëndësi, më mirë të fitosh titullin kampion në fund. Vendi i parë ka presion, sepse me kalimin e ndeshjeve duhet ruajtur me patjetër ky pozicion. Ne të gjithë e dimë që nuk duhet të na kapë euforia e tifozëve. Do shikojmë vetëm në tri ndeshjet e fundit se cila skuadër është në vend të parë dhe cila në të dytin”.
Një protagonist absolut me kryesuesit e kampionatit italian, Hysaj tregon se transferimi në “San Paolo” ishte basti i karrierës, një lëvizje falë së cilës është rritur në aspektin individual. “Ishte një ambient shumë i vështirë për mua në fillim, e pashë si një investim për veten. Thashë: Do të shkoj në Napoli, do e provoj dhe do rrezikoj, ose jam futbollist i madh, ose lojtar për Serinë B apo për ekipe të vogla në Serinë A. Kjo ishte një provë e karrierës sime, por edhe sikur të më thoshin në fillim të firmosja për një sezon të tillë, nuk do ta kisha besuar. Jam përmirësuar shumë në mbrojtje, në një kundër është e vështirë të më kalosh, pasi po stërvitem me lojtarë si Mertens, Insinje apo Higuain dhe kundër lojtarëve të tjerë bëhet gjithçka më e thjeshtë.
Në fund të vitit 2015, Hysaj u vlerësua si mbrojtësi më i mirë i djathtë në Serinë A për gjysmën e parë të kampionatit dhe si një prej më të mirëve në Europë për këtë pozicion. Por, ky nuk është maksimumi, pasi 21-vjeçari beson se mund të përmirësohet ende. “Për të luajtur titullar përpara Maggios ka qenë pak e vështirë, pasi ai është një kampion dhe ka shumë vjet te Napoli. Më dhanë besim, skuadra filloi të luante mirë dhe unë po përmirësohesha. Akoma nuk kam arritur në maksimumin tim dhe shpresoj të vazhdoj kështu e të mos ndalem”.
Hysaj flet edhe për diferencat ndërmjet Napolit dhe Kombëtares. Dy ide të ndryshme loje, që u kanë sjellë suksese skuadrave. “Është lojë e ndryshme. Një mendim tjetër i skuadrës dhe taktikë e ndryshme. Te Napoli luajmë në vijë dhe me top, ndërsa në Kombëtare duhet të mbulojmë secili lojtarin e tij. Janë mendime të ndryshme që kanë prurë shumë përmirësime, si te Napoli, ashtu edhe në Kombëtare. Në përfaqësuese jemi lojtarë që vrapojmë, që kemi zemër të madhe. Kjo është loja jonë prej tre vjetësh dhe nuk mund ta ndryshojmë”. Në fund edhe një batutë për ambientimin në Napoli, qytet që nuk është shumë i ndryshëm nga Shkodra. “Napoli ka të veçantë se të gjithë pinë kafe në mëngjes si në Shkodër. Ka kafe pa fund, që gjenden si në Shqipëri”.
