Kombëtarja, para se të luajë play-off për Botërorin 2026, do të njohë kundërshtarët për Ligën e Kombeve 2026–2027. Shorti do të hidhet sot në orën 18:00 në Bruksel.
Shqipëria është pjesë e Ligës C, pasi sezonin e kaluar e mbylli e fundit në grupin e saj. Kuqezinjtë janë kokë grupi, ashtu si Islanda, Mali i Zi dhe Kazakistani.
Në vazon e dytë ndodhen rivalët më të fortë: Finlanda, Sllovakia, Bullgaria dhe Armenia. Në vazon e katërt ka skuadra që ende nuk e kanë përcaktuar nëse do të jenë në Ligën C apo do të zbresin në Ligën D, pasi në mars do të zhvillojnë takimet play-off.
Liga e Kombeve këtë sezon vlen edhe si një mundësi më shumë për t’u kualifikuar në Euro 2028. Takimet e fazës së grupeve në Ligën e Kombeve do të zhvillohen nga muaji shtator deri në nëntor.
