Presidenti i SHBA-ve, Donald Trump, ka përshkallëzuar luftën tregtare me Kanadanë duke njoftuar se do të rrisë në 50% tarifat për importet e makinave, kamionëve dhe çelikut kanadez. Përmes një postimi në rrjetin social Truth Social, kreu i Shtëpisë së Bardhë bëri me dije se masat e reja tarifore do të hyjnë në fuqi më 1 janar 2027.
Trump e arsyetoi këtë vendim duke akuzuar Otavën se ka dëmtuar fermerët amerikanë përmes politikave të saj dhe se “ka mashtruar Shtetet e Bashkuara për vite me radhë”.
Kjo masë e re nënkupton dyfishimin e detyrimeve kryesore doganore të SHBA-së për automjetet kanadeze, të caktuara aktualisht në nivelin 25%, ndërsa tarifat për importet e çelikut ndodhen tashmë në kuotën e 50%.
“Prodhojeni në SHBA dhe tarifat do të jenë zero. Kanadaja nuk do të trajtohet më si një shtet!”, shkroi Trump. Kanadaja ka plaçkitur Shtetet e Bashkuara të Amerikës për vite me radhë”, deklaroi Trump, duke e cilësuar situatën si “të paqëndrueshme”.
Ai vijoi kritikat ndaj Otavës, duke argumentuar se Kanadaja është shumë më e varur nga tregtia me SHBA-në sesa anasjelltas.
“Ne nuk kemi nevojë për Kanadanë. Kanadaja ka nevojë për ne”, tha presidenti amerikan.
Paralajmërimi i Uashingtonit vjen pasi pala kanadeze kërkoi uljen e këtyre tarifave si pjesë të një pakti të ri tregtar me SHBA-në, bisedime të cilat dukeshin pranë përfundimit përpara se të dështonin mbrëmjen e së premtes.
Ky përshkallëzim pason vendimin e të shtunës, ku SHBA-ja vendosi tarifa prej 50% mbi një sërë mallrash kanadeze me një vlerë të përgjithshme prej rreth 20 miliardë dollarësh, me fokus te verërat, çimentoja dhe produkte të tjera industriale e bujqësore.
