Ministri për Evropën dhe Punët e Jashtme, Ferit Hoxha, mori pjesë sot në konferencën ndërkombëtare “Ballkani takohet në Trieste”, të organizuar nga agjencia italiane e lajmeve ANSA dhe Aleanca e Agjencive Ballkanike të Lajmeve (ABNA), në bashkëpunim me Rajonin Friuli Venezia Giulia dhe Nismën e Evropës Qendrore (CEI).
Në qendër të këtij aktiviteti ishte Paneli i Parë me temë “Zgjerimi, Komunikimi Strategjik dhe Kundërvënia ndaj Dezinformimit”, ku Ministri Hoxha përcolli mesazhe kyçe lidhur me të ardhmen e rajonit dhe sfidat e përbashkëta evropiane.
Gjatë fjalës së tij, Hoxha theksoi se zgjerimi i BE-së nuk është thjesht një projekt politik transformues, por një investim strategjik në sigurinë, stabilitetin dhe qëndrueshmërinë si të Ballkanit Perëndimor ashtu edhe të Evropës në tërësi.
“Është një përpjekje e vërtetë fitimprurëse, që sjell përfitime për të dyja palët. Shqipëria mbetet e palëkundur në angazhimin e saj ndaj rrugës së saj evropiane dhe ndaj një rajoni të ankoruar fort brenda familjes evropiane“, tha Hoxha.
Megjithatë, shtoi ai, në mjedisin gjeopolitik gjithnjë e më kompleks të sotëm, komunikimi strategjik është bërë një komponent integral i politikës së jashtme.
“Dezinformimi, ndërhyrja e huaj dhe manipulimi i informacionit synojnë të shfrytëzojnë ndasitë, të gërryejnë besimin në institucionet demokratike dhe të dobësojnë besimin e publikut në demokraci dhe projektin evropian. Sa më shumë i afrohemi anëtarësimit në BE, aq më shumë bëhemi shënjestër për ata që nuk ndajnë vizionin, vlerat apo ambiciet tona.
Pikërisht për këtë arsye gazetaria e besueshme dhe agjencitë e lajmeve të përgjegjshme kanë më shumë rëndësi se kurrë. Ata që mbledhin, verifikojnë dhe shpërndajnë informacion janë ndër linjat e para të mbrojtjes kundër manipulimit dhe shtrembërimit. Faktet, gazetaria profesionale dhe komunikimi transparent mbeten mjete të domosdoshme për forcimin e qëndrueshmërisë demokratike dhe mbrojtjen e debatit publik”, deklaroi Hoxha.
Për Shqipërinë, sipas tij, komunikimi publik i qartë dhe i besueshëm rreth zgjedhjes sonë evropiane është një përparësi strategjike.
“Kjo do të thotë të shpjegohen jo vetëm reformat tona, progresi dhe rezultatet tona, por edhe mundësitë, përgjegjësitë dhe përfitimet afatgjata që vijnë me anëtarësimin në BE.
Ndërtimi i besimit publik në këtë udhëtim është po aq i rëndësishëm sa edhe avancimi i vetë udhëtimit. Dhe në këtë përgjegjësi të përbashkët, secili prej nesh ka një rol për të luajtur: mbrojtjen e së vërtetës, mbështetjen e fakteve dhe rezistencën ndaj atyre që kërkojnë të manipulojnë, ndajnë ose shtrembërojnë zgjedhjet tona demokratike dhe të ardhmen tonë evropiane“, përfundoi Hoxha.
