Ministri i Jashtëm i Turqisë Hakan Fidan pritet të zhvillojë sot, 12 maj, një vizitë në Katar.
Siç raportohet, gjatë takimeve të tij në Doha, Fidan pritet të shqyrtojë përgatitjet për mbledhjen e 12-të të Komitetit të Lartë Strategjik, i cili është planifikuar të mbahet më vonë gjatë vitit në Turqi, nën drejtimin e Presidentit Recep Tayyip Erdoğan dhe Emirit të Katarit Tamim bin Hamad Al Thani.
Ai gjithashtu pritet të riafirmojë solidaritetin e Turqisë me Katarin pas sulmeve të fundit të ndodhura në muajt mars dhe prill.
Sipas burimeve, Fidan do të theksojë shqetësimin e Ankarasë për rivendosjen e lirisë së lundrimit në Ngushticën e Hormuzit, duke nënvizuar rëndësinë e saj për sigurinë rajonale dhe stabilitetin ekonomik.
Ai pritet gjithashtu të theksojë se zhvillimet e fundit në rajon kanë treguar edhe një herë rëndësinë në rritje të bashkëpunimit në fushën ushtarake dhe të mbrojtjes, si dhe rëndësinë strategjike të projekteve të lidhjes infrastrukturore për stabilitetin rajonal.
Gjatë vizitës, Fidan pritet të diskutojë edhe çështjen e Gazës dhe zhvillimet diplomatike në rajon. Për Turqinë, zgjidhja e mosmarrëveshjeve në Gjirin Persik përmes një marrëveshjeje të qëndrueshme mbetet një prioritet urgjent.
Gjithashtu, ai pritet të nënvizojë nevojën për forcimin e bashkëpunimit rajonal në bazë të rolit të vetë vendeve të rajonit në menaxhimin e konflikteve dhe paqëndrueshmërisë, veçanërisht në kontekstin e asaj që Ankaraja e konsideron si veprime destabilizuese të Izraelit në rajon.
Sipas burimeve, Fidan do të tërheqë vëmendjen për nevojën që komuniteti ndërkombëtar të informohet më gjerësisht për krizën humanitare në Gaza dhe Bregun Perëndimor, të shkaktuar nga veprimet e Izraelit.
Ai pritet gjithashtu të paralajmërojë kundër politikave të qeverisë izraelite që, sipas Ankarasë, dëmtojnë përpjekjet për paqe.
Siç shkruajnë mediat turke, në fund, Fidan do të ndalet te ruajtja e sovranitetit dhe integritetit territorial të Libanit, në kushtet e sulmeve të vazhdueshme, është thelbësore për shmangien e një destabilizimi të mëtejshëm të rajonit.
