Elton Sefa është shqiptari i parë që do të ekstradohet drejt Britanisë së Madhe, i akuzuar për vrasjen e një personi, në prill të vitit të kaluar, në Londër.
23-vjeçari vrau punëtorin John Woodward, 47 vjeç, i cili u gjet i vdekur poshtë një godine, në të cilën po punonte bashkë me shqiptarin.
Sipas hetimeve, shqiptari dyshohet se e ka goditur viktimën disa herë me sende të forta në kokë, dhe më pas e hodhi nga çatia.
Sefa u arrestua pak ditë më parë në Xhafzotaj të Durrësit ku jetonte me familjen e tij.
Por si u zbulua krimi që kishte kryer?
Ishin mjekët ligjorë ata që thanë se pasi kqyrën trupin e viktimës, konstatuan se kishte goditje të rënda në trup dhe kokë.
Hetuesit thanë se besonin se ai ishte sulmuar nga një njeri që punonte bashkë me të në çatinë ku ndodhi ngjarja.
Para se të identifikohej, i dyshuari përshkruhej si një mashkull i bardhë, rreth 20 vjeç që kishte veshur një xhaketë blu, një bluzë poshtë saj, xhinse blu dhe çizme pune të zeza.
Pas hetimeve intensive rezultoi se vrasësi ishte shqiptari 23-vjeçar.
/a.r
