Dashuria e tyre është me të vërtetë e pazakontë, aq më tepër po të kujtosh fillimet e saj e cila ka nisur pranë një kazani plehrash. Mund të duket për të qeshur, por kjo është e vërteta e një 88-vjeçare e cila tashmë do të martohet me burrin e pastrehë. Bëhet fjalë për 40 vjet më parë, ku burri ishte duke kërkuar ushqime në kazanin e vendosur pranë një dyqani.
Joan Neininger u ndje shumë keq kur e pa Ken Selway në atë gjendje dhe i përgatiti atij sanduiçë e ia hodhi në kazan që ai t’i gjente. Dashuria shpërtheu në atë fillim të pashpresë dhe Joan përfundimisht e la burrin e saj Norman për të jetuar me Ken, i cili vuan nga skizofrenia.
Por lidhja e tyre ishte e pazakontë dhe ata nuk kishin kontakt seksual dhe kështu ajo vendosi që të rikthehej sërish me Norman e të mos e braktiste as të dashurin e saj, Ken. Për shumë vjet ata jetuan të tre së bashku dhe të lumtur.
Tani e veja Joan dhe Ken 89 vjeç, janë rezidentë në azilin e të moshuarve në Gloucestershire dhe do të martohen në Gjendjen Civile në ditëlindjen e saj që është në mes të shkurtit.
“Kur e pashë atë duke kërkuar nëpër kazanët e plehrave pranë librarisë sime në Gloucester, nuk e mendova kurrë për asnjë moment se si mund të përfundonte e gjitha kjo. Por edhe pse ai ishte duke jetuar në rrugë, e dija se Ken ishte një njeri i dashur dhe i bukur në shpirt”, tha Joan. 
