Sekretari i përgjithshëm i Hezbollahut, Naim Qassem, ka renditur pesë hapa që sipas tij duhet të pasojnë armëpushimin mes Izraelit dhe Libanit.
Në një deklaratë të shpërndarë nga mediat lokale, ai theksoi se marrëveshja e paqes duhet të përfshijë: ndërprerje të përhershme të agresionit në të gjithë territorin libanez nga ajri, toka dhe deti; tërheqjen e forcave izraelite deri në kufijtë e njohur; lirimin e të burgosurve; kthimin e banorëve në fshatrat dhe qytetet e tyre pranë kufirit; si dhe rindërtimin me mbështetje arabe dhe ndërkombëtare, duke ruajtur përgjegjësinë kombëtare.
Qassem e cilësoi dokumentin e marrëveshjes së armëpushimit të shpërndarë nga Departamenti i Shtetit i SHBA-së si “pa rëndësi praktike” dhe një “fyerje për Libanin”.
Ai shtoi se Hezbollahu është i hapur për bashkëpunim në nivelin më të lartë me autoritetet libaneze dhe synon “hapjen e një faqeje të re”.
Megjithatë, ai paralajmëroi se një armëpushim nënkupton ndalim të plotë të veprimeve armiqësore nga të dyja palët.
“Meqenëse nuk i besojmë këtij armiku, luftëtarët e rezistencës do të qëndrojnë në fushëbetejë me gishtat në këmbëz dhe do t’i përgjigjen çdo shkeljeje në mënyrë proporcionale,” tha ai, duke nënvizuar se armëpushimi nuk mund të jetë vetëm nga ana e rezistencës, por duhet të respektohet nga të dyja palët.
