Integrimi Europian kushtëzohet nga shumë faktorë, por detyrë parësore mbetet zbatimi në praktikë i reformës në drejtësi, lufta kundër korrupsionit si dhe zgjedhjet e lira dhe të ndershme”.
Konstatimi vjen nga Komiteti Shqiptar i Helsinkit, që ka publikuar raportin vjetor mbi situatën e respektimit të të drejtave dhe lirive të njeriut për për vitin 2018, ku theksohet se pavarësisht rezultatave të arritura, në këtë drejtim mbetet shumë për të bërë. Raporti analizon disa fusha, duke nisur nga reforma në drejtësi, korrupsioni në arsimin e lartë, e drejta e pronës apo reforma zgjedhore.
Më konkretisht në raport thuhet se vettingu ka nisur të japë rezultatet e para konkrete, por vonesat në zbatimin e ligjit të vettingut, vonesat në ngritjen e institucioneve të reja kanë krijuar ngërçe dhe probleme shqetësuese në drejtim të aksesit të qytetarëve në drejtësi, dhe në shqyrtimin e çështjeve të grumbulluara në këto gjykata veçanërisht në Gjykatën Kushtetuese dhe në Gjykatën e Lartë. Në drejtim të strehimit dhe pronësisë, rezulton se nga trajtimi i ankesave të qytetarëve është vërejtur mosrespektimi i afateve ligjore të njoftimit për prishjen e banesave nga ana e IKMT-së, si dhe mungesa e alternativave të qëndrueshme të strehimit për njerëzit në nevojë.
Gjithashtu, në drejtim të konfliktit te Unaza e Madhe, KSHH ripërsërit thirrjen për gjetjen e një zgjidhje adekuate dhe konform standardeve të vendosura nga Gjykata e Strasburgut. Ndërkaq, në drejtim të korrupsionit, raporti vëren se ai mbetet i lartë dhe faktet e kohëve të fundit tregojnë se edhe në sektorin e arsimit aktet korruptive nuk kanë munguar. “Në forumet e organizuara nga KShH me studentë të Universiteteve janë evidentuar forma të ndryshme të shfaqjes së korrupsionit”,-shtohet në raport. Ndërkaq, në drejtim të reformës zgjedhore raporti thekson se ajo vijon të mbetet peng i monopolit të partive politike. (SCan)
