Në një kohë kur në Kuvend vijon diskutimi i ligjit të ri “Për shkencën” dhe konferenca e rektorëve ka shprehur kundërshti për draftin e propozuar nga qeveria, kjo trupë akademike gjatë një takimi me kryetaren e Kuvendit, Elisa Spiropali, la mënjanë shqetësimet e shprehura prej ditësh.
Në takimin e thirrur nga Spiropali, rektorët patën kritika për çështje të tjera të artikuluara gjatë viteve të fundit, si ndërkombëtarizimi i universiteteve apo ulja e numrit të studentëve.
Rektorët po ashtu kërkuan më shumë takime konsultative, pasi sipas tyre dialogu sjell dhe përmirësimin e nismave ligjore. Nga ana tjetër kryetarja e Kuvendit shfrytëzoi këtë takim për të komentuar sërish ngjarjet e të enjtes, duke thënë se veprimet e opozitës nuk janë shembull për t’u ndjekur nga të rinjtë.
“Përgjegjësinë e lartë për të mbajtur hapur linjat e komunikimit dhe bashkëpunimit, partneriteti dhe dialogut të Kuvendit të Shqipërisë dhe konferencës së rektorëve në Kuvendin e Shqipërisë. Bashkëpunimin e realizojmë vetëm pak ditë pas çeljes së vitit akademik. Vijoj sot në këtë takim pas një të enjteje të trazuar në seancën plenare, padyshim seria e radhës e një filmi të parë shumë herë që pavarësisht shkaqeve dhe faktorëve sfidon solemnitetin e pushtetit legjislativ, dëmton funksionalitetin e tij dhe jep një shembull të keq në raportin mes nevojës dhe reagimit, pritshmërive dhe realitetit. Ai mur berlinez urrejtjeje që ngrihet aq artificialisht në atë sallë ai demonstrim i panevojshëm i shndërrimit të kundërshtarit në armik janë në gjykimin tim dhe besoj në të shumicës së qytetarëve krejt të panevojshëm dhe të papranueshëm. E përmenda të djeshmen sepse besoj se vetëm drita e arsimit dhe edukimit mund të lërë në hije këtë të kaluar dhe të tashme plot dritëhije dhe tension.”
a2news
