Tri partitë opozitare edhe një herë kanë konfirmuar se nuk do t’i ndalin veprimet e tyre derisa Qeveria të reflektojë karshi dy marrëveshjeve të Brukselit, atë për Asociacionin e Komunave Serbe, si dhe për Demarkacionin me Malin e Zi. Përfaqësuesit e Lëvizjes “Vetëvendosje”, të AAK-së dhe të “Nismës”, si dhe qindra aktivistë të këtyre tri subjekteve, të shtunën kanë marrë pjesë në një tubim në “Sallën e Kuqe”, në Prishtinë. Ata kanë shprehur qëndrimet e tyre lidhur me gjendjen në Kosovë, si dhe krizën institucionale në të cilën po kalon vendi.
Para se të fillonte tubimi forca të shumta të Njësisë Speciale të Policisë ishin mobilizuar afër “Sallës së Kuqe”, kjo për arrestimin e mundshëm të tre deputetëve të Kuvendit, Albin Kurtit, Albulena Haxhiut dhe Faton Topallit, për të cilët Gjykata Themelore para disa ditëve ka lëshuar fletarrest, por ata nuk ishin prezentë në sallë.
Ndërkohë, opozita e bashkuar është zotuar se për datën 28 nëntor do të mbahet një protestë, e cila, sipas tyre, do të jetë marsh paqësor në kundërshtim të dy marrëveshjeve me Serbinë dhe Malin e Zi.
