Hania, Kretë – Ka çelur sot punimet në Hania të ishullit të Kretës (Greqi), Simpoziumi i 10-të i Evropës Juglindore dhe Lindore për Perimet dhe Patatet, një nga ngjarjet më të rëndësishme shkencore të sektorit, e organizuar nën kujdesin e Shoqatës Ndërkombëtare për Shkencën Hortikulturore (ISHS). Edhe pse mban një emërtim gjeografik rajonal, simpoziumi ka mbledhur bashkëkërkues shkencorë, studentë dhe profesionistë nga mbarë bota për të diskutuar mbi sfidat e prodhimit, që nga bujqësia organike e deri te teknologjitë e reja të mjediseve të mbrojtura në epokën e ndryshimeve klimatike.
Në ceremoninë zyrtare të hapjes, Anëtarit të Akademisë së Shkencave të Shqipërisë, Prof. Dr. Nazim Grudës, iu akordua Medalja e ISHS-së, së bashku me kolegun e tij nga Universiteti Bujqësor i Athinës, Profesor Dimitrios Savvas. Ky vlerësim ndërkombëtar dëshmon për punën e tij sistematike dhe përkushtimin e vijueshëm në organizimin e simpoziumeve të ISHS-së. Kjo medalje është e treta për të (Rumani-2023; Gjermani-2025; dhe Greqi-2026).
Gjatë ditëve të simpoziumit, akademik Gruda do të udhëheqë diskutime kyçe, do të prezantojë ligjërata mbi sistemet reziliente ndaj klimës, si dhe do të kryesojë sesione mbi përshtatjen e perimeve ndaj stresit abiotik. Një rëndësi e veçantë do t’i kushtohet edhe workshop-it të Organizatës Botërore të Ushqimit dhe Bujqësisë (FAO) me qendër në Romë, i cili do të zhvillohet më 19-20 maj nën drejtimin e tij, me fokus trajtimin e diversitetit të sistemeve agro-ushqimore në vendet e Evropës Junglindore, Azisë Qendrore, dhe Kaukazit Jugor. Angazhimi i tij do të vijojë deri në mbylljen e punimeve me ndarjen e çmimeve për talentet e rinj.
Pavarësisht këtij suksesi individual të Prof. Grudës, që lartëson shkencën shqiptare, mbetet për t’u shënuar me keqardhje një fakt: në këtë simpozium të rëndësishëm ndërkombëtar, asnjë shkencëtar apo kërkues tjetër nga Shqipëria nuk do paraqesë gjetje apo studime në fushën e perimeve dhe patates.
