Franca u përball me një valë të re protestash gjatë fundjavës së Halloween-it, ku rreth 320 mijë persona dolën në rrugë në mbarë vendin për të shprehur pakënaqësitë ndaj kostos së lartë të jetesës, pabarazisë sociale dhe politikave qeveritare.
Demonstratat, të mbështetura nga lëvizja e “Jelekëve të Verdhë”, sindikatat dhe grupime studentore, u zhvilluan në disa qytete të mëdha, përfshirë Parisin, Marsejën, Lionin, Tuluzën dhe Bordoin.
Autoritetet franceze vendosën rreth 70 mijë policë dhe xhandarë në të gjithë vendin për të parandaluar trazirat dhe incidentet e mundshme.
Pamjet nga protestat krijuan një atmosferë të pazakontë, ku maskat e Halloween-it u ndërthurën me skena protestash, tym zjarresh dhe përplasje me policinë.
Në Bordo, një protestues i maskuar si personazhi “Ghostface” nga filmat “Scream” u pa pranë një zjarri të ndezur mbi shinat e tramvajit, duke u bërë një nga imazhet më të komentuara të ditës.
Në Paris, protesta nisi në mënyrë paqësore, por tensionet u rritën në fund të marshimit. Disa protestues të maskuar shkulën gurë nga trotuaret dhe i hodhën ndaj forcave të sigurisë, ndërsa një koktej Molotov u hodh në drejtim të policisë. Efektivët reaguan me gaz lotsjellës dhe operacione për shpërndarjen e turmës.
Kryeqyteti francez pa gjithashtu pjesëmarrës të veshur si personazhe të njohur, mes tyre Spider-Man, Frankenstein dhe figura zombish, ndërsa mbi zonat e protestës patrullonin helikopterë të sigurisë.
Sipas Ministrisë së Brendshme franceze, vetëm në Paris morën pjesë rreth 70 mijë protestues. Megjithëse shumica e demonstratave mbetën paqësore, incidente dhe përplasje u regjistruan edhe në Marsejë, Lion dhe Tuluzë.
Autoritetet kishin shtuar masat e sigurisë pas thirrjeve që qarkulluan në rrjetet sociale për organizimin e tubimeve gjatë natës së Halloween-it nën sloganin “Nata e Errësirës”, të cilat promovonin veprime më radikale kundër institucioneve shtetërore.
Në javët e fundit, kërkesat e protestuesve janë zgjeruar përtej çështjeve të arsimit, duke përfshirë rritjen e kostos së jetesës, krizën e strehimit, pabarazitë sociale dhe kritikat ndaj mënyrës se si policia menaxhon protestat.
