Halim Kosova ka vendosur të shkelë me vendosmëri në hapat e paraardhësit të tij. Megjithëse është treguar i kujdesshëm që të mos e ketë në krah Bashën në fushatën që po bën, ai i ka bërë të tijat premtimet (e pambajtura) të kreut në ikje të bashkisë. Një rast i tillë është premtimi që Kosova bëri sot për ndërtimin e një spitali bashkiak. Mjafton të shqyrtosh premtimet e zotit Basha në vitin 2011, kur bënte fushatë kundër Edi Ramës, që të gjesh pa vështirësi se edhe Basha asokohe premtonte të njëjtën gjë si Kosova sot: pra një spital të qytetit.
Ja çfarë thuhet konkretisht në premtimet e Lulzim Bashës në këtë aspekt:
“Unë premtoj se ato detyra që i takojnë Bashkisë do të kryhen. Do të bëhet sistemimi i ambjenteve të qendrave spitalore universitare të Tiranës, përmirësimi me shpejtësi i atyre elementëve të infrastrukturës, qendrave shëndetësore dhe të urgjencës, ku Bashkia mund të ndërhyjë vetë apo në bashkëpunim edhe me donatorët. Do të fillojmë duke dedikuar gjithmonë e më shumë, gjithmonë e më mirë, infrastrukturën që lejon shpejtësinë e caktuar për ambulancat dhe shërbimin e tyre. Dhe do të vazhdojmë kështu në të gjitha fushat e tjera, për sigurimin e ajrit të pastër, standardeve të sigurta ushqimore, trajtimit bashkëkohor të mbetjeve, si edhe një ujësjellës-kanalizim cilësor”
Gjithashtu, në premtimet e tij elektorale shkruhej: “Spitali i Sanatoriumit do të shndërrohet në një spital modern vetëm për qytetaret e Tiranës dhe njësive vendore fqinje, që do të ofrojë shërbim me shtretër dhe në të njëjtën kohë edhe shërbim të specializuar ambulator”. Katër vjet më pas, jo vetëm që mjekët s’kanë parë ndonjë spital të ndërtuar nga Bashkia, por as spitali i Sanatoriumit nuk u shndërruar në një spital modern vetëm për qytetarët, por u la në mëshirë të fatit.
Të njëjtën gafë, pra përsëritjen e premtimeve të Lulzim Bashës, Kosova vazhdon ta bëjë edhe me premtimet e tij për banesat sociale, për terrenet sportive, për uljen e taksave, të cilat janë premtime që Basha nuk i mbajti në 2011.
Me sa duket stafi i zotit Kosova as nuk është lodhur të gjejë ndonjë ide konkrete, por i ka rënë shkurt duke i servivur Kosovës të njëjtat premtime që Luli bëri dhe nuk i mbajti në vitin 2011.
