Plot 211 kg kanabis janë sekuestruar nga policia e Kurbinit si dhe janë asgjësuar mbi 28 mijë bimë kanabis në kuadër të një hetimi disa mujor, pas të cilit Policia e Lezhës, në bashkëpunime me Prokurorinë e Krimeve të Rënda dhe Shërbimin për Çështjet e Brendshme dhe Ankesat ka arrestuar 7 persona dhe ka shpallur në kërkim 5 të tjerë.
Mes të arrestuarve është edhe një polic, i cili favorizonte kultivuesit e drogës kundrejt pagesës. Të arrestuarit janë nga 19 deri në 52 vjeç, ndërsa mësohet se droga kultivohej në zona të ndryshme.
POLICIA
Nga Sektori për Hetimin e Narkotikëve në Drejtorinë për Hetimin e Narkotikëve dhe Trafiqeve në bashkëpunim me Drejtorinë Vendore të Policisë Lezhë, Prokurorinë për Krime të Rënda Tiranë dhe me SHÇBA-në, pas një hetimi disa mujor finalizoi me sukses operacionin hetimor dhe policor në lidhje me procedimin penal numër 147 të vitit 2016, ku u bë e mundur goditja e një grupi të strukturuar kriminal, në fushën e kultivimit të bimëve narkotike në rrethin e Kurbinit.
Gjatë këtij procedimi penal janë sekuestruar rreth 211 kg lëndë narkotike të llojit cannabis sattiva, si edhe u sekuestruan dhe u asgjësuan gjithsej 28.480 bimë të llojit cannabis sattiva.
Pjesë e këtij grupi kriminal janë 6 shtetasit e arrestuar dhe 5 shtetas të tjerë të shpallur në kërkim.
Të arrestuar janë shtetasit:
1- Bashkim Kodra 46 vjeç, banues në Kurbin
2- Elton Hoxha 23 vjeç, banues në Kurbin
3- Hashim Nelaj, 19 vjeç, banues në Kurbin
4- Lefter Nelaj, 43 vjeç, banues në Kurbin
5- Aldo Xhaferri , 29 vjeç, banues në Mamurras i cili ndodhet në I.P.V. Shënkoll -Lezhë
6- Sami Balloku, 38 vjeç, banues në Kurbin i cili ndodhet në I.P.V. Shënkoll -Lezhë
Janë shpallur në kërkim dhe punohet për kapjen e:
1- A.T. 37 vjeç, banues në Kurbin
2- A.Gj. 41 vjeç, banues në Kurbin
3- B.T. 34 vjeç, banues në Kurbin
4- L.N. 40 vjeç, banues në Kurbin
5- B.H. 23 vjeç, banues në Kurbin
Prokuroria për Krimet e Rënda Tiranë, ka caktuar masën e sigurisë “Arrest me burg”, pasi dyshohen për kryerjen e veprave penale “Kultivimi i bimëve narkotike”, “Grup i strukturuar kriminal”, dhe “Kryerja e veprave penale nga organizata kriminale dhe grup i strukturuar kriminal”.
Po ashtu u arrestua dhe shtetasi Zan Kasmi, 52 vjeç, banues në Kurbin, specialist i policisë së zonës, sepse në zonën që mbulon, ka favorizuar persona të ndryshëm, në kultivimin e bimëve narkotike, kundrejt vlerave monetare.
Në lidhje me këtë hetim është bashkëpunuar edhe me autoritetet italiane, pasi lënda narkotike e kultivuar nga ky grup kriminal dyshohej se do të trafikohej drejt Italisë./BW/a.m.