Grupi i ekspertëve të pavarur i përbërë nga Përparim Ameti, Shpejtim Bulliqi dhe Florim Isufi ka reaguar pas konferencës për media të Komisionit shtetëror në lidhje me Demarkacionin.
Ky grup i ekspertëve me anë të një postimi në ‘Facebook’, shkruar se Demarkacioni është një mashtrim që po i bëhet Kosovës për vijën kufitare me Malin e Zi.Ata thonë se komisioni nuk ka ofruar fakte të reja siç ata kishin paralajmëruar, citohet “ZËRI”.
Për më shumë lexoni reagimin e tyre:
DEMARKACIONI NJË MASHTRIM TOTAL
Me vëmendje përcollëm konferencën për media të Komisionit shtetëror dhe me keqardhje ju informojmë që ky është një mashtrim që po i bëhet Kosovës për vijën kufitare me Malin e Zi.
Gjatë debatit të 3 Gushtit 2016, nuk patëm përgjigje në lidhje me kadastrën e Malit të Zi përgjatë gjithë vijës kufitare me Kosovën. Edhe sot asnjë parcelë kadastrale nuk u prezantua përgjatë gjithë vijës kufitare dhe se prezantimi i njëanshëm nuk ishte asgjë tjetër, përpos një tentimi për të mbuluar mos argumentimin e demarkacionit dhe manipulimet që janë bërë më te si proces.
Prezantimi i komisionit nuk ofroi fakte të reja siç ata kishin paralajmëruar, por u konfirmua ajo që ekspertet e pavarur dëshmuan me 3 Gusht 2016. Andaj ne ju sigurojmë që Mali i Zi, nuk ka dëshmi kadastrale përgjatë gjithë vijës kufitare me Kosovën dhe se nuk është e kuptueshme përcaktimi i një vije kufitare të ndryshme nga ajo e kushtetutës se vitit 1974.
Në momentin e duhur, grupi i ekspertëve të pavarur, do të thërras konference për media dhe do të dëshmoj që ky demarkacion është totalisht jo i rregullt, i pa argumentuar dhe i dëmshëm për Kosovën. (b.an)
