Në një intervistë të zhvilluar para se David Bowie të ndërronte jetë më 10 janar, Iman, gruaja e tij e ka zbuluar sekretin që i ka quar në 24 vjet martesë atë dhe yllin e rokut. Ish supermodelja e cila ishte martuar me Bowie’n në vitin 1992, vetëm dy vjet pasi për herë të parë ishin takuar, ka thënë se “koha”, është gjithçka.
“Kur ishim në shtëpi me njëri tjetrin, ne ishim vetëm Iman dhe David. Askush tjetër”, ka thënë Iman e cila është 60 vjeçare, shkruan People.
“Duhet që të jesh në momentin e duhur në jetë, kur je gati për një lidhje që do të zgjasë përgjithmonë, që bëhet prioritet në jetën tënde”, ka thënë ajo.
“Nëse karriera është e rëndësishme për ju, mos u martoni e mos bëni fëmijë. Si gra që jemi, ne duam t’i kemi të gjitha, por s’mund t’i kesh të gjitha në të njëjtën kohë. Kështu që duhet t’i caktoni prioritetet për momente të caktuara”.
Bowie ka vdekur i rrethuar nga familjarët e tij në New York, pasi për 18 muaj kishte luftuar me kancerin. Ai ka vdekur në moshën 69 vjeçare.
