Ambasada greke ka njoftuar sot zyrtarish në lidhje me lëvizjen e shtetasve të Shqipërisë drejt tokës së vendit fqinj.
Sipas selisë diplomatike, Greqia do të respektojë udhëzimet e Bashkimit Evropian. Ajo shprehet se nuk do të lejohet hyrja e personave nga Shqipëria përmes detit apo tokës.
Ambasada shprehet se ky regjim do të vazhdojë edhe pas 1 korrikut. Ndërkohë shteti grek po mendon mundësinë për të lejuar hyrjet veç përmes aeroportit të Athinës
Njoftimi i plotë:
Sipas udhëzimeve evropiane për hapjen e kufijve të BE-së dhe vendimeve respektive zbatuese të Greqisë (ΦΕΚ Β’ 2283/14.06.2020), në lidhje me udhëtimet nga Shqipëria për në Greqi, parashikohet mundësia e realizimit të fluturimeve drejt aeroportit Eleftherios Venizellos të Athinës.
Nuk lejohet hyrja e personave nga Shqipëria për në Greqi permes linjave detare, rrugore apo hekurudhore.
Përjashtohen:
a) Qytetarë Grekë, posedues të Kartës së Veçantë të Identitetit të Homogjenit, poseduesit e lejeve të qëndrimit, si dhe persona që kanë banesën kryesore të tyre apo që qëndrojnë zakonisht në Greqi,
b) kalimi i kamionëve për transport mallrash,
c) transporti i mallrave me anije,
d) hyrja e personave nëpërmjet kufijve tokësorë, për lëvizje absolutisht të nevojshme të karakterit profesional, të cilat i faktojnë me dokumentat përkatëse.
Ky rregjim lëvizjesh pritet të vazhdojë të jetë në fuqi edhe pas datës 1 korrik.
Ambasada e Greqisë në Tiranë do të lajmërojë menjëherë me njoftim të saj, për çdo ndryshim që mund të rezultojë.
