Qeveria e Greqisë ka refuzuar propozimin “Republika Ilinditase e Maqedonisë”. Nga kabineti i kryeministrit Tsipras, pas takimit që pati Zaev në Shkup me liderët partiak, kanë njoftuar se është për t’u përshëndetur fakti që pala në Shkup ka pranuar se nuk mund të ketë zgjidhje “pa erga omnes”, gjegjësisht për të gjitha përdorimet.
“Megjithatë, ne i inkurajojmë fqinjët tanë të vazhdojmë të punojmë së bashku që të gjejmë zgjidhje të përbashkët me përcaktim gjeografik ose kohor, siç është propozuar nga ana e negociuesit Metju Nimic“, deklaron qeveria greke
Gjatë ditës, Tsipras ka informuar liderët parlamentare dhe presidentin e Greqisë, për propozim emrin, por nuk mori përkrahje. Të gjithë liderët e opozitës e kanë refuzuar propozimin e ri duke thënë se me të “përforcohet irredentizmi”.
Tsipras pati një bisedë telefonike edhe me nënpresidentin amerikan, Mike Pence.
Të dy bashkëbiseduesit “ndanë mendimin që të dy palët kanë një shans historik për të zgjidhur këtë çështje”, thuhet në njoftimin përkatës të Shtëpisë së Bardhë.
“Nënpresidenti inkurajoi kryeministrin Tsipras të vazhdojë bashkëpunimin me kryeministrin Zaev për një zgjidhje reciprokisht të pranueshme. Zgjidhja e kësaj çështjeje do të promovojë stabilitetin dhe paqen në rajon”, përfundon njoftimi i Shtëpisë së Bardhë.
a.ç
