Menjëherë pas një seance të rëndësishme parlamentare, ku u miratua ligji që i jep fund një herë e mirë basteve sportive dhe kazinove në vendin tonë, Kryetari i Grupit Parlamentar Taulant Balla, Ministrja e Shëndetësisë Ogerta Manastirliu, deputetë dhe drejtues lokalë zhvilluan një takim me gra dhe vajza në Elbasan.
Për më shumë se 25 vite, Shqipëria ishte pushtuar nga bastet dhe kazinotë dhe ishin pikërisht nënat dhe motrat shqiptare që e vuanin një fenomen të tillë në familje.
Balla tha se 90% e grave shqiptare e mbështetën këtë vendim të rëndësishëm të ndërmarrë nga mazhoranca dhe të miratuar nga Parlamenti Shqiptar, ndërkohë që opozita, edhe këtë here, nuk mori pjesë në Parlament për të votuar një ligj që mbron familjen:
“I mbyllëm bastet dhe tani jeni rehat, për Vit të Ri, burrat do t’i keni në shtëpi. Nuk do rrijë burri as me Ronaldon as me Mesin, do rrijë me ty dhe me fëmijët.
90% e grave e kanë mbështetur këtë vendim që ne kemi marrë sot, sepse vëmendja jonë është tek familja, vëmendja jonë është për ju.
Pjesa më e madhe e grave të Shqipërisë na kishin kërkuar t’i jepnim fund kësaj mortje që kishte 25 vjet që qarkullonte dhe ishte biznesi më i madh në këtë vend që gjoja na paskësh prodhuar 7 mijë vende pune, por që në fakt vit pas viti na kishte shkatërruar dhjetëra mijëra familje. Të vetmit që fitonin nga e gjithë kjo histori ishin bizneset e basteve dhe pjesa më e madhe e pronarëve të këtyre kompanive, sikurse e tha dhe Kryeministri sot në Kuvend, ishin persona të dënuar për vepra të ndryshme kriminale.
Ja pra, ku ndahen ata që seriozisht e kanë betejën me krimin dhe ata që krimin e kanë thjesht dhe vetëm një alibi për bashkëpunimin e tyre më të.
Nuk është larg 2009-ta dhe Elbasani e di shumë mirë se si bashkëpunoi Lulzim Basha me persona me të shkuar kriminale madje i nxorri dhe nga burgu për t’i përdorur për intimidimin e socialistëve, për intimidimin e qytetarëve të Elbasanit.
Kjo është e vërteta e madhe. Sot PD, nëse realisht e do familjen shqiptare, nënat motra dhe të mirën e këtij vendi, duhet të ishte e pranishme në Kuvendin e Shqipërisë dhe të jepte votën pro mbylljes së basteve dhe lojërave të fatit.
Megjithatë ne e dimë që PD s’ka ekip, lidership jo e jo, program as bëhet fjalë.”
Ministrja Ogerta Manastirliu tha se kurrë më parë Parlamenti Shqiptar nuk kishte marrë një vendim kaq të rëndësishëm në mbështetje të familjes dhe shoqërisë:
“Kurrë nuk ka pasur një vendim më të drejtë të marrë nga Parlamenti Shqiptar sesa ky vendim që mbështet 100% familjen, mbështet 100% gratë, mbështet 100% nënat, motrat, mbështet 100% të dobëtit përpara të fortit dhe kurrë nuk ka pasur një vendim kaq të drejtë që ne të kemi fëmijë më të shëndetshëm, të kemi shoqëri më të zhvilluar dhe me sa më pak vese.
90% e grave, nënave, vajzave ishin pro këtij vendimi që ne si PS morëm dhe sot e votuam në Parlament.”
Deputeti Ervin Bushati theksoi se pavarësisht reformave të rëndësishme që ka ndërmarrë kjo qeveri, kurrë më parë nuk ishte sulmuar, sa u sulmua për ligjin e bixhozit:
“Këto dy javë që jemi marrë me ligjin kemi qenë në një presion të madh, shumë të egër dhe të shëmtuar nga një grup i madh interesi që kanë qenë pro basteve.
Ne kemi bërë shumë reforma; reforma në drejtësi, reforma në energji, reforma territoriale, por asnjëherë nuk kemi pasur kaq shumë konflikt, debat dhe mbrojtje të një ligji që ka të bëjë me bixhozin.
E kuptoni sa e shëmtuar është kjo?
Kemi bërë kaq shumë reforma dhe asnjëherë nuk na kanë kundërshtuar kaq shumë sa për ligjin e bixhozit.”
Deputetja Evis Kushi nga ana e saj vuri në dukje rëndësinë e një vendimi të tillë dhe përkrahjen e madhe që i dhanë qytetarët:
“Kemi miratuar një ligj shumë të rëndësishëm, një ligj i cili garanton mbylljen e kazinove, basteve dhe të gjitha aktiviteteve të tjera që përfshihen në lojërat e fatit.
Në fakt që në momentin e parë që e kemi ndërmarrë këtë nismë si mazhorancë, të gjithë deputetëve të parlamantit na kanë ardhur, pa pushim, mesazhe nga më të ndryshmet, përfshirë edhe ato kërcënueset, por mbi të gjitha na kanë ardhur mesazhe mbështetëse, mesazhe falenderimi nga gra, vajza të cilat kanë pritur me padurim këtë vendim që të shërojë një plagë të hershme të shoqërisë dhe familjes shqiptare.
Të gjithë jemi dëshmitarë sesi industria e lojërave të fatit ka shkatërruar shumë familje dhe ka shkaktuar dëme të mëdha ekonomiko-sociale.”
Por ky nuk do të jetë ligji i vetëm në mbështetje të familjes. Prej 1 Janarit do të jetë taksativ vendimi për marrjen e ndihmës ekonomike vetëm nga gratë , por gjithashtu edhe përdorimi i kësaj shume vetëm për nevoja të familjes.
ma.me
