Autori i tentativës së grabitjes në një market në Kamzë, ku mbeti e plagosur edhe një 19-vjeçare tri ditë më parë, duket se e ka studiuar mirë zonën para se të kryente sulmin e dhunshëm.
Autori i ngjarjes, i filmuar nga kamerat e sigurisë me një kallashnikov në duar, mbetet ende i paidentifikuar.
Megjithatë, policia ka vazhduar me marrjen në pyetje të personave dëshmitarë të ngjarjes dhe mbledhjen e provave që mund të çojnë në identifikimin e autorit të krimit.
Për këtë arsye, pas disa dëshmive të marra në vendin e ngjarjes, policia ka sekuestruar pamjet e kamerave të sigurisë së disa bizneseve pranë marketit për gjithë periudhën njëmujore të fundit.
Sekuestrimi i pamjeve është bërë pas disa dëshmive të marra nga policët në vendin ku ndodhi plagosja e 19- vjeçares I. Dushku.
Dëshmitarët i kanë thënë policisë se një person me fizik të ngjashëm me atë të autorit (i filmuar teksa qëllon me armë dhe lëviz në tunelin e pallatit ngjitur me marketin), e kanë parë edhe më herët në atë zonë.
“Personi ka qenë me kapuç të ulur deri te balli. Ka qëndruar para marketit dhe në zonën në hyrje të tunelit për disa ditë”, mësohet t’u kenë dhënë dëshmitarët hetuesve të Policisë.
Sipas burimeve nga hetimi, dëshmitarët kanë pohuar se nuk ka shumë ditë që e kanë parë “të dyshuarin” për herë të fundit. Ai kishte qenë i vetëm dhe nuk dukej si banor i zonës, ndërkohë që nuk kishte hyrë në market, ndonëse dukej sikur nga jashtë është përpjekur të shihte ambientet e brendshme.
Për këtë arsye, policia ka vendosur të sekuestrojë pamjet filmike të muajit të fundit nga kamerat e vendosura në atë zonë, me shpresën se i dyshuari mund të jetë fiksuar pa maskë.
Nga ana tjetër, bazuar në të dhënat e marra në vendin e ngjarjes, policia ka dyshime se autori i krimit nuk ka pasur qëllim grabitjen, ndërsa nuk përjashtohet edhe hetimi mbi mundësinë që autori të ketë qenë nën efektin e lëndëve të ndaluara.
Mënyra kaotike se si ka vepruar autori i ngjarjes, duke shtënë me armë kuturu, i bën hetuesit të dyshojnë. Por ai ka qenë i saktë në largimin nga vendi i krimit pasi ka zgjedhur një rrugicë qorre, pa ndriçim, që të shpie në drejtim të Laknasit, ku ka ikur në këmbë.
Policia, e cila shkoi në vendin e ngjarjes, gjeti pamjet e kamerave të sigurisë në momentin e grabitjes dhe disa gëzhoja rreth marketit, por pa arritur ta identifikojë autorin e dyshuar të krimit.
Panorama/d.i.
