Policia e Beratit ka zbardhur dhe ka dokumentuar disa vjedhje të ndodhura pak ditë më parë. Sipas policisë janë dokumentuar katër vjedhje të ndodhura në lokale, në data të ndryshme, ndërsa është vënë në pranga një 17-vjeçar
“Arrestimi i u bë pasi nga kontrolli i ushtruar në automjetin tip Ford të cilin ja kishte marrë me qera shtetasit R.S, u gjetën dhe sekuestruan në cilësinë e provës materiale një çantë brenda së cilës kishte bizhuteri dhe produkte ushqimore të cilat dyshohet se janë vjedhur në banesa dhe lokale të ndryshme”, shkruhet në deklaratën e policisë.
Njoftimi i policisë
Zbardhen 4 vjedhje banesash e lokalesh të ndodhura më parë.
Më datë 17.01.2018 nga Specialistët e Seksionit për Krimet u bë arrestimi në flagrancë i shtetasit:
R.H, 17 vjeç, banues në Berat, (i dënuar më parë) si dhe filloi procedimi penal në gjendje të lirë në ngarkim të shtetasit R.S, 30 vjeç, banues në Berat.
Arrestimi i shtetasit të lartpërmendur u bë pasi nga kontrolli i ushtruar në automjetin tip Ford të cilin ja kishte marrë me qera shtetasit R.S, u gjetën dhe sekuestruan në cilësinë e provës materiale një çantë brenda së cilës kishte bizhuteri dhe produkte ushqimore të cilat dyshohet se janë vjedhur në banesa dhe lokale të ndryshme.
Në vijim të veprimeve hetimore u shpallën në kërkim policor shtetasit:
- M.R, 18 vjeç, banues në Berat, i dënuar më parë.
- R.S, 18 vjeç, banues në Berat, i dënuar më parë.
Këta shtetas në bashkëpunim me shtetasin R.H, dyshohen si autorë të ngjarjeve të ndodhura si më poshte:
- Më datë 08.01.2018, në fshatin Dyshnik, dyshohen se kanë vjedhur te lokali i shtetasit A.Z, disa produkte të ndryshme.
- Më datë 12.01.2018, dyshohen se kanë vjedhur në banesën e shtetasit L.D në lagjen Kala, disa bizhuteri.
- Më datë 13.01.2018, në fshatin Dyshnik, dyshohen se kanë vjedhur përsëri te lokali i shtetasit A.Z, produkte të ndryshme.
Më datë 14.01.2018, dyshohen se kanë vjedhur disa produkte te lokali i shtetasit K.H.
Materialet i kaluan Prokurorisë së Rrethit Gjyqësor Berat, për veprën penale “Vjedhja”, parashikuar nga neni 134 i Kodit Penal.
