Gjykata e Tiranës ka dënuar për shpifje kryetarin e PD, Lulzim Basha.
Pas padisë së Taulant Ballës për rastin e ‘Toyota Auris’, gjykata dënoi Bashën me 50 mijë lekë gjobë.
Taulant Balla e quajti një vendim historik, ndërsa tha se lekët do të shkojnë për një kopësht.
“Shuma e gjobës do shkojë për një kopësht. Dënimi me 21 janar, le të jetë një ogur i mirë për krimin shtetëror në bulevardin “Dëshmorët e Kombit”. Ne politikanët duhet të trajtohemi njëlloj nga gjykata. Ky është një vendim historik. Duhet të refklektojmë gjatë. Basha i detyrohet shtetit të shlyejë dënimin e merituar“, tha Balla
Opozita e quajti një vendim të padrejtë, ndërsa paralajmëroi apelimin e tij.
“Drejtësia është kapur nga Rama. Dënohet akuzuesi dhe mbron të akuzuarin. Do e ankimojmë vendimin e gjykatës. Gjykata u tregua qesharake“, tha Gazmend Bardhi
3.4 mln eurot u gjetën në 2 automjete “Toyota Auris” në Portin e Durrësit në qershor të vitit të kaluar, për të cilën Basha akuzoi Ballën se ishte i përfshirë, akuza të cilat socialisti i cilësoi si shpifje duke ngritur padi ndaj tij për shpifje dhe dekonspirim të operacionit.
Pikërisht kjo deklaratë ndryshoi planet e operacionit kriminal të Alfred dhe Elvis Vladit. Makinat supozoheshin të niseshin nga porti Ankonës por devijuan rrugën dhe u nisën nga porti i Barit.
Më herët Gjykata e Krimeve të Rënda ka lënë në burg pa afat katër personat e arrestuar; Edi e Klevis Lika, Alban Mollaymeri dhe Agim Çeka. Ndërkohë Alfred dhe Elvis Vladi janë shpallur në kërkim.
Javanews/a.cupaj
VENDIMI
Në emër të Republikës
Gjykata e Rrethit Gjyqësor Tiranë e përbërë nga gjyqtar Gerd Hoxha asistuar prej sekretares gjyqësore Znj. Silvi Xhakolli sot më datë 21 janar 2019, me pjesëmarrjen e Prokurorisë së Rrethit Gjyqësor Tiranë, përfaqësuar nga prokurori Z. Agron Gjana, mori në shqyrtim në seancë gjyqësore publike, kërkesën penale me nr. 208 akti, me;
Viktima akuzuese: Taulant balla, i biri i Kasëm dhe i Fatime, i dtl. 12.08.1977,
lindur në Librazhd dhe banues në Tiranë Rr. “Reshit Petrela”, shqiptar, i martuar, arsimi i lartë, i padënuar, përfaqësuar në gjykim nga Av. Genjtna Rumano.
I akuzuar: Lulzim Basha, i biri i Xhelal dhe i Remzije, i dtl.12.06.1974, lindur dhe banues në TIranë, Rr “Demor Gashi”, Nr.3, shqiptar, i martuar, i padënuar, përfaqësuar në gjykim nga Av.Ivi Kaso dhe Av.Gazmend Bardhi.
Palë e interesuar: Prokuroria e Rrethit Gjyqësor Tiranë përfaqësuar në gjykim nga prokurori z. Agron Gjana.
Akuzuar: Për veprën penale të “Shpifjes” parashikuar nga neni 120/2 i K.Penal.
Gjykata, në përfundim të shqyrtimit gjyqësor, pasi administroi provat shkresore; dëgjoi viktimën akuzuese Z. Taulant Balla që kërkoi deklarimin fajtor dhe dënimin e të akuzuarit Z. Lulzim Basha për kryerjen e veprës penale të “Shpifjes” së kryer botërisht, parashikuar nga neni 120/2 i KP’
dëgjoi mbrojtësit e të akuzuarit Z.Lulzim Basha që kërkuan pafajësi ose pushimin e gjykimit;
…
nga neni 120/2 i K.Penal dhe në bazë të këtij neni, dënimin e të akuzuarit me 50 000 (pesëdhjetëmijë) lekë gjobë. Në aplikim të nenit 34 të KP, i akuzuari Lulzim Basha do ta paguajë këtë gjobë brenda një afati prej 6 muajsh, nga dita që ky vendim do të marrë formë të prerë. Shpenzimet procedurale në ngarkim të të akuzuarit. Kundër këtij vendimi mund të bëhet ankim, brenda 15 ditëve nga e nesërmja e shpalljes së tij, në Gjykatën e Apelit Tiranë.
