Gjykata Administrative e Tiranës nuk pranoi kërkesën e pesë gjyqtarëve magjistratë të dekretuar në 23 qershor nga Presidenti Republikës për pezullimin e këtyre dekreteve. Kërkesa në fjalë ishte objekti i masës së sigurimit të padisë së depozituar nga magjistratët në Administrative, ku palë e paditur është Presidenti i Republikës dhe Këshilli i Lartë i Drejtësisë.
Magjistratët nisën përballje gjyqësore me Presidentin dhe KLD-në, duke pretenduar si të paligjshëm emërimin e tyre me short dhe jo në bazë të vlerësimit nga Shkolla e Magjistraturës. Në padinë e nënshkruar prej tyre, magjistratët kërkojnë anulimin dhe konstatimin e pavlefshëm të procedurës së shortit në KLD, të propozimit për emërimin e tyre dhe të dekreteve të Presidentit të Republikës.
Burime të Panorama pranë Gjykatës theksuan se në seancën e parë të shqyrtimit të masës së sigurimit të kësaj padie, gjyqtarja Selvie Gjocaj nuk pranoi kërkesën e paditësve për pezullimin e dekreteve të kreut të shtetit për emërimet e nëntë magjistratëve të vitit 2014-2015. Aktualisht magjistratët janë në pritje të ceremonisë së betimit e tyre, e cila shënon momentin e fundit procedurial para se ata të nisin zyrtarisht punën si gjyqtarë.
Në padinë e tyre, magjistratët nënvizonin se, nëse Administrativja do të pranonte padinë e tyre në një kohë që ata do të kishin nisur ushtrimin e detyrës, atëherë vendimet e shpallura prej tyre deri në atë moment do të ktheheshin në nul. Betimi i tyre pritet të bëhet nesër. U bë e ditur se Këshilli i Lartë i Drejtësisë ka planifikuar zhvillimin e një mbledhjeje në 8 korrik, ku pjesë e rendit të ditës është edhe ceremonia e betimit të 9 magjistratëve të dekretuar së fundmi.
