Avokati i njohur Spartak Ngjela deklaron se ambasadori amerikan Donald Lu ka refuzuar të presë sot në takim kryeprokurorin e Përgjithshëm Adriatik Llalla.
Përmes një postimi në Facebook, ai shprehet se ky i fundit ka kërkuar takim me diplomatin e lartë amerikan në vendin tonë.
Ngjela ka përshëndetur vendimin e Lu-së, duke shkruar se politika amerikane po i qëndron besnike shqiptarëve.
“Politika amerikane dhe ambasadori Lu po i qëndrojnë besnikë shqiptarëve; ashtu siç nuk i ka qëndruar asnjë kryeministër, asnjë mbret dhe asnjë pushtetar i lartë që nga viti 1925 deri më sot.
Ambasadori amerikan nuk i dha sot takim Prokurorit të Përgjithshëm Llalla.
Gjithçka filloi.
Prisni dhe shikoni, por assesi nuk duhet të jeni indiferentë.
Që sot e më tej do të shihni implikime të klasës aktuale politike; dhe njëherësh edhe fillimin e vetingut për gjyqtarët dhe prokurorët shqiptarë.
Prisni me besim dhe shikoni tragjedinë e krijuesve të varfërisë dhe vuajtjes së shqiptarëve,” shkruan Ngjela në rrjetin social Facebook. /b.d
