Në kuadër të turit të dëgjesave me publikun , drejtuesi politik i Partisë Socialiste në Qarkun e Vlorës Damian Gjiknuri zhvilloi një bashkëbisedim me banorë të rajonit 1 dhe 3. Në këtë aktivitet ai shoqërohej nga deputetët e zgjedhur Vilma Bello e Edmond Leka ashtu sikurse kryetari i Partisë Socialiste të Vlorës Anduel Tahiraj.
“Dëshirojmë të vazhdojmë me këtë komunikim, në mënyrë që të marrim nevojat më prioritare që të jenë pjesë e punës sonë, nisur dhe nga programi që kemi paraqitur dhe nga interesat e projektet që ka Vlora. Për të dëgjuar mbi të gjitha zërin e elektoratit direkt, në lidhje me gjërat që keni më prioritare. Kjo, në mënyrë që sapo të fillojë puna e qeverisë së re, të fillojnë e të zbatohen një e nga një”, u shpreh Gjiknuri gjatë bashkëbisedimit.
Në vlerësimin e tij, fitorja e 25 Qershorit duhet menduar si një përgjegjësi e shtuar përballë qytetarëve.
“Ky mandat nuk duhet të na vërë në gjumë dhe të jemi të qetë se gjithçka shkoi mirë. Përkundrazi, është një obligim për të vazhduar më tej procesin e nisur, sidomos në lidhje me përmirësimin e administratës publike dhe shërbimit ndaj qytetarëve. Unë e kam konstatuar vet, po e them, ka shumë njerëz që ankohen për shërbimet e administratës. Qytetarët kanë shumë probleme dhe ka shumë nevojë për përmirësim. Në bashkëbisedim edhe me njerëzit do të bëjmë edhe vlerësimin e punës së administratës, çfarë kemi mundësi të përmirësojmë në mënyrë që njerëzve tu vihet me shërbim sa më të mirë”, nënvizoi Gjiknuri.
Gjatë takimit morën fjalën shumë qytetarë të cilët ngritën problematika të ndryshme për tu kthyer në çështje prioritare, si ato të shërbimit shëndetësor, sistemit arsimor, ndërhyrjes për shtimin e hapësirave të gjelbra, zgjidhjen e problemeve të pronësisë dhe ndërtimeve pa leje. /b.d
