Christa Pike, 50 vjeçe, mbetet në gjendje kritike në një spital në Nashville, Tennessee, pasi ekzekutimi i saj me injeksion vdekjeprurës dështoi dy herë të mërkurën. Avokati i saj, Stephen Ferrell, tha se mjekët po përpiqen ende të largojnë nga trupi dy doza pentobarbitali dhe se prognoza e saj mbetet e paqartë.
Pike ndodhet në ventilator dhe, sipas avokatit, nuk dihet nëse ka rifituar ndonjëherë vetëdijen. Ferrell tha se gjendja e saj mund të kërkojë disa ditë për t’u vlerësuar dhe se ende nuk dihet nëse do të ketë dëmtime afatgjata apo probleme me aftësinë e saj mendore.
Pike u dënua me vdekje për vrasjen e 19-vjeçares Colleen Slemmer në vitin 1995, kur ajo ishte 18 vjeçe. Slemmer u torturua dhe u vra në Knoxville, Tennessee. Pike u dënua me vdekje një vit më vonë.
Pas dështimit të ekzekutimit, autoritetet nuk kanë dhënë ende një shpjegim për faktin se çfarë shkoi keq dhe nuk kanë treguar nëse do të tentojnë sërish ta ekzekutojnë. Guvernatori i Tennessees, Bill Lee, pezulloi ekzekutimet në shtet për pjesën e mbetur të vitit, ndërsa drejtuesi i sistemit të burgjeve njoftoi dorëheqjen.
Avokati Ferrell i bëri thirrje guvernatorit që dënimi me vdekje i Pike-s të zëvendësohet me burgim të përjetshëm. Ai tha se ajo ka kaluar më shumë se 30 vjet në burg, pjesën më të madhe në izolim, dhe se ende nuk dihet se çfarë vuajtjesh ka përjetuar gjatë përpjekjes së dështuar për ekzekutimin.
Nëna e viktimës, May Martinez, kishte udhëtuar drejt Nashville për të ndjekur ekzekutimin. Ajo kishte mbështetur dënimin me vdekje të Pike-s dhe tha se shpërtheu në lot, pasi mësoi se ekzekutimi nuk kishte përfunduar me sukses.
Autoritetet e Departamentit të Korrigjimeve të Tennessees kanë mbrojtur protokollin e injeksionit vdekjeprurës, duke deklaruar se procedura nuk parashikon masa shtesë, përtej atyre që u kryen.
Avokatët e Pikes kishin paralajmëruar më herët se problemet e saj shëndetësore, përfshirë trombocitozën dhe venat e vogla, mund të rrisnin rrezikun e dhimbjes dhe vuajtjeve gjatë injektimit vdekjeprurës.
