Në ambientet e ministrisë së Drejtësisë, u nënshkrua marrëveshja e bashkëpunimit ndërmjet Dhomës Kombëtare të Noterisë Shqiptare dhe Dhomës Federale Gjermane të Noterëve. E pranishme në këtë ceremoni ishte edhe ministrja e Drejtësisë, znj. Etilda Gjonaj, si dhe përfaqësues të ambasadës Gjermane dhe noterët.
Përpara nënshkrimit të kësaj marrëveshjeje, ministrja e Drejtësisë, Etilda Gjonaj e cilësoi si shumë të rëndësishëm një bashkëpunim të tillë, duke shtuar se reformimi i Noterisë, si një shërbim i lirë profesional është një ndër objektivat kryesorë të Ministrisë së Drejtësisë, por njëkohësisht dhe e qeverisë shqiptare. Në fjalën e saj, Gjonaj u shpreh se në kuadër të reformimit të sistemit të drejtësisë përfshihet dhe reformimi i noterisë.
“Ministria e Drejtësisë është në fazën e dhënies së mendimeve për projektligjin e noterisë të konsultuar me ekspertët e Euralius dhe me Dhomën Federale gjermane të Noterisë. Ndërkohë që një grup i posaçëm i Ministrisë është ngritur dhe po përgatit një analizë të detajuar lidhur me modelet më të mira që janë në vendet e BE, si Gjermania, Italia dhe Franca, por njëkohësisht po studion problematikën që është hasur deri tani nga shërbimi i ofruar i noterisë, që nga mënyra e organizimit, licensimi i noterëve dhe deri tek monitorimi i rregullueshmërisë së veprimtarisë së tyre”- tha Ministrja Gjonaj.
Ministrja theksoi se vizioni i Ministrisë së Drejtësisë është që ta përmirësojë cilësinë e ofrimit të shërbimit të noterëve drejt qytetarëve, duke rritur profesionalizmin e noterëve si dhe të forcojë mekanizmat inspektues, masat dhe procedurat disiplinore ndaj noterëve me qëllim fuqizimin e shtetit ligjor.
ma.me
