Ish-kryetari i VV’së Visar Ymeri ka kërkuar që Albin Kurti të heq dorë nga kandidatura për të parin e VV’së. Ish kryetari i LVV’së, Visar Ymeri, pas përfundimit të mbledhjes së Lëvizjes Vetëvendosje, ku u diskutua për gjendjen e fundit brenda organizatës, tha se nuk pret përafrim të qëndrimeve mes dy blloqeve.
Tha se secili anëtar duhet t’i ketë përpara interesat e partisë para interesave personale. “Konsideroj që LVV’ja është në një fazë jashtëzakonisht të rëndësishme dhe në këtë fazë do të duhej që secili të heq dorë nga vetja për të mirën e organizatës, dhe mendoj që kjo do të ishte zgjidhja për organizatën. Por nuk e di nëse kjo do të ndodhë”, theksoi Ymeri.
Përçarjet e mëdha brenda Vetëvendosjes janë manifestuar me një numër të madh dorëheqjesh, përfshirë ish-kryetarin Visar Ymeri dhe ish-sekretarin e Përgjithshëm, Dardan Molliqajn.
Ndërkohë, Albin Kurti është kandidat i vetëm për kryetar të VV’së në zgjedhjet partiake që pritet të mbahen muajin e ardhshëm. Është raportuar se ishte kandidimi i Kurit për kryetar partie nga i cili nisën përçarjet. (b.an)
