Komisioni i Veprimtarisë Prodhuese, Tregtisë dhe Mjedisit miratoi në mbledhjen e së martës projektligjin “Për ratifikimin e marrëveshjes ndërmjet Këshillit të Ministrave të Shqipërisë dhe Qeverisë së Republikës Federale të Gjermanisë, për bashkëpunimin financiar në kuadër të projektit “Linja unazore 110 KV e Shqipërisë Jugore (Përmirësimi i eficencës në fushën e energjisë”)”.
Sipas relacionit që shoqëron këtë projektligj, një grant prej 2 milionë euro do të financohet nga qeveria gjermane, nëpërmjet Kfw, për përmirësimin e kushteve teknike administrative për Operatorin e Sistemit të Shpërndarjes së Energjisë Elektrike (OSHEE).
Ky fond është pjesë e marrëveshjes mes dy qeverive, për masën shoqëruese të projektit “Linja unazore 110 KV në Shqipërinë Jugore”. Granti do të ndihmojë me shërbime këshillimore të menaxhimit të OSHEE-së dhe ka si objektiv kryesor që të kontribuojë në procesin e rimëkëmbjes të sektorit të energjisë elektrike; uljen e konsiderueshme dhe të qëndrueshme të humbjeve (teknike dhe jo teknike) në sistemin e shpërndarjes; përmirësimin e performancës operacionale dhe financiare të OSHEE-së; forcimin e kompetencës dhe kapaciteteve organizative, manaxheriale dhe mirëqeverisjes së përgjithshme të OSHEE-së.
Marrëveshja parashikon që kjo shumë do të zhvlerësohet, në rast se kontratat përkatëse për financim nuk përfundohen brenda 8 vjetësh pas vitit të premtimit dhe konkretisht brenda datës 31 dhjetor 2021. Kjo marrëveshje nuk ka efekte financiare shtesë për buxhetin e shtetit./a.m.
