Hidrogjeni po shihet si alternativë nga Evropa për të reduktuar karburantet fosile ruse. Gjermania dhe Kanadaja kanë nënshkruar marrëveshje bashkëpunimi për prodhim dhe transportim të hidrogjenit. Marrëveshjen e kanë nënshkruar ministrat e Ekonomisë së të dyja shteteve, në praninë e Kancelarit gjerman, Olaf Scholz dhe Kryeministrit kanadez, Justin Trudeau në qytetin kanadez, Stefenvill.
Trudeau e ka konsideruar nënshkrimin e marrëveshjes si “hap historik drejt të ardhmes së përbashkët”.
“Objektivi ynë është i qartë. Fillimi i punës drejt eksporteve të hidrogjenit në Gjermani deri në vitin 2025”, tha Kryeministri kanadez.
Ndërsa Kancelari gjerman, i shoqëruar në udhëtimin e tij nga ministri i Ekonomisë Robert Habeck dhe një delegacion i madh i drejtuesve të biznesit dhe industrisë, e quajti marrëveshjen “një hap të rëndësishëm për forcimin e marrëdhënieve ekonomike dypalëshe”.
Përdorimi i hidrogjenit nuk prodhon gazra serë. Për ta prodhuar atë, uji duhet të ndahet në hidrogjen dhe oksigjen me anë të elektrolizës, e cila është miqësore me klimën.
Aktualisht kostoja e prodhimit të hidrogjenit është më e shtrenjtë se blerja e gazit natyror por ekspertët besojnë se përmes kësaj mund të mbahen të qëndrueshme çmimet e faturave të energjsië të cilat janë rritur në disa vende të Evropës për shkak të luftës në Ukrainë.
/e.d
