Presidenti italian Sergio Mattarella ka mandatuar pasditen e sotme Giuseppe Conten për krijimin e qeverisë së re.
Pas këtij vendimi, Conte do të krijojë kabinetin e qeverisë euroskeptike, i cili më pas duhet të dekretohet nga Presidenti Mattarella.
“Qeveria jonë do të jetë qeveri e ndryshimit. Do të jem avokati mbrojtës i popullit italian” – ka thënë Conte fill pas mandatimit.
Më herët, Conte zhvilloi një takim dy orësh me presidentin. Ai vjen si propozim i Lëvizjes “5 Yjet” dhe Legës, por edhe me pëlqimin e Silvio Berluskonit.
Italia qëndroi plot 80 ditë në pritje të qeverisë së re.
Kush është Giuseppe Conte?
Një avokat i të drejtës private në Unniversitetin e Firenze-s, me përvoja ndërkombëtare në universitetet më me emër, që nga Yale, Cambridge dhe Sorbona, që vjen nga Lëvizja 5 Yjet.
Para afrimit me këtë të fundit, Conte ka gëzuar simpatinë e ish-kryeministrit Mateo Renzi.
Madje, disa ditë më parë, kur emri i tij u përmend për herë të parë si kandidat i mundshëm, Renzi e shigjetoi me një batutë: Lëvizja 5 Yjet dashka të bëjë kryeministër mikun e Maria Elena Boschi-t?
Para votimit, lideri i Lëvizjes 5 Yjet e ka prezantuar si ministër të mundshëm të Administratës Publike.
I lindur në Foggia, në vitin 1964, Conte është diplomuar në drejtësi në universitetin “La Sapienza” me nota maksimale.
Ai ka qenë anëtar i disa fondacioneve dhe agjencive shtetërore.
Në vitin 2013, me vendim Parlamenti është zgjedhur anëtar i Këshillit të Presidencës së Drejtësisë Administrative.
Në atë rast bëri bujë CV-ja e tij me 18 faqe.
