Ministria e Financave bëri të ditur të hënën se nuk ka treg oligopol dhe as monopol në furnizimin dhe mirëmbajtjen e kasave fiskale që prej vitit 2007. Përmes një deklarate të shpërndarë për mediat, MF shpjegon edhe procedurat se si aplikohet.
“Vendimi i Këshillit të Ministrave nr.781, datë 14.11.2007, i ndryshuar “Për karakteristikat teknike e funksionale të pajisjeve fiskale, sistemit të integruar të kompjuterizuar për transferimet periodike, automatike, të deklarimeve financiare, sistemit të komunikimit, për procedurën e dokumentacionin për miratimin e tyre dhe për kriteret për pajisjen, me autorizim, të shoqërive të autorizuara për ofrimin e pajisjeve fiskale” e ka të liberalizuar tregun e shitjes dhe mirëmbajtjes së pajisjeve fiskale”, shpjegohet nga ministria e Financave.
Konkretisht, sipas MF-së, në sesionin II të këtij vendimi, “Procedura e aplikimit dhe e autorizimit të shoqërive të autorizuara” është përcaktuar se “çdo person juridik apo bashkim personash juridikë, vendas ose i huaj, i organizuar si shoqëri aksionare, që kërkon të pajiset me autorizimin “Shoqëri e autorizuar” për furnizimin dhe mirëmbajtjen e pajisjeve fiskale, duhet të paraqesë pranë Ministrisë së Financave kërkesë me shkrim për konkurim për marrjen e autorizimit si “shoqëri e autorizuar”, si dhe dokumentacionin e kërkuar në bazë të ligjit.
Aplikanti, sqaron MF-ja, duhet t’i bashkëlidhë dosjes së aplikimit mandat arkëtimin e pagesës së tarifës së shërbimit, në shumën 200 000 (dyqind mijë) lekë, në llogarinë e Ministrisë së Financave. Dokumentet dorëzohen në protokollin e Ministrisë së Financave. Aplikantit i kthehen ato për plotësim, në qoftë se mungon qoftë edhe një nga dokumentet e sipërpërmendura. Të gjitha dokumentet duhet të jenë në gjuhën shqipe, në origjinal ose të njehsuara me origjinalin./
