Oleksandra dhe katër qentë e saj janë strehuar në banjën e banesës së saj në Kharkiv që nga fillimi i sulmeve. Në një rrëfim për BBC, e reja tregon se kur ka dëgjuar shpërthimet e para, gjëja që ka bërë ka qenë shpëtimi i qenushëve të saj.
“Kur dëgjova shpërthimet e para, vrapova nga shtëpia për të nxjerrë jashtë qentë e mi nga dhomat e tyre. Njerëzit ishin në panik, po i linin makinat e tyre. Unë isha shumë e frikësuar,”- thotë ajo.
25-vjeçarja tregon se ka folur rregullisht me nënën e saj, e cila jeton në Moskë. Por në këto biseda, madje edhe pasi i dërgoi video nga vendlindja e saj e bombarduar rëndë, Oleksandra nuk është në gjendje ta bindë nënën e saj për rrezikun që ndodhet.
“Nuk doja t’i trembja prindërit e mi, por fillova t’u them drejtpërdrejt se civilët dhe fëmijët po vdesin. Por edhe pse shqetësohen për mua, ata ende thonë se ndoshta ndodh vetëm rastësisht, se ushtria ruse nuk do të vinte kurrë në shënjestër qytetarët. Se janë ukrainasit ata që po vrasin njerëzit e tyre. U frikësova shumë kur mamaja ime citoi saktësisht televizionin rus. Ata thjesht po u shpërlajnë trurin njerëzve. Dhe njerëzit u besojnë atyre. Prindërit e mi e kuptojnë se disa veprime ushtarake po ndodhin këtu. Por ata thonë: “Rusët erdhën për t’ju çliruar. Ata nuk do të shkatërrojnë asgjë, nuk do t’ju prekin. Ata kanë në shënjestër vetëm bazat ushtarake,”- thotë Oleksandra.
Mediat ruse thonë se kërcënimi për civilët ukrainas nuk vjen nga forcat e armatosura ruse, ai vjen nga nacionalistët ukrainas që përdorin civilët si mburoja njerëzore.
Kanalet televizive shtetërore ruse po justifikojnë luftën duke fajësuar agresionin ukrainas dhe vazhdojnë ta quajnë atë “një operacion special çlirimi”. Çdo media ruse që përdor fjalët “luftë”, “pushtim” ose “sulm” përballet duke u bllokuar.
g.kosovari
