Një dokument i përfshirë në dosjen hetimore të Jeffrey Epstein, e cila është bërë publike nga autoritetet gjyqësore amerikane, përmban referenca mbi përzgjedhjen e vajzave të reja për punë, mes tyre edhe një shtetase shqiptare.
Emaili, i datës 29 mars 2017, është pjesë e materialeve të sekuestruara gjatë hetimeve që u zhvilluan ndaj financierit të ndjerë.
Në përmbajtjen e komunikimit përmenden disa “kandidatë kryesorë”, të cilët i prezantohen një personi tjetër për vlerësim. Mes tyre përshkruhet një vajzë ruse 21-vjeçare, për të cilën theksohen jo vetëm të dhënat mbi arsimin dhe statusin e vizës së punës në Shtetet e Bashkuara, por edhe elementë që lidhen me pamjen fizike dhe gatishmërinë për të përmbushur çdo kërkesë.
Në të njëjtin email bëhet fjalë edhe për një vajzë shqiptare, për të cilën thuhet se është e gatshme të kryejë “çdo lloj pune”, por që nuk shihet si zgjedhje e favorshme për shkak të vështirësive që lidhen me dokumentacionin. Në komunikim përmendet gjithashtu se ekzistojnë video të kandidateve.
“Kandidatë të tjerë janë gjithashtu në proces përzgjedhjeje, por nuk banojnë në Nju Jork. Vajza shqiptare do të bënte gjithashtu çdo lloj pune që kërkohet, megjithatë dokumentet e saj paraqesin komplikime. Videoja është në dispozicion”, thuhet në një pjesë të emailit.
Zbulimi i këtij dokumenti hedh dritë mbi mënyrën se si funksiononte procesi i rekrutimit në rrethin e Jeffrey Epstein, ndërsa autoritetet amerikane vijojnë shqyrtimin e materialeve për të përcaktuar përgjegjësi të tjera të mundshme penale.
