Frika për ekonominë dhe pasojat e luftës në Ukrainë po shtyn një pjesë të rusëve të tërheqin shuma të mëdha parash nga bankat.
Sipas sipas analistit të “Sky News”, Michael Clarke, ai ka komentuar mundësinë që presioni ekonomik dhe ushtarak të krijojë kundërshtime më serioze ndaj pushtetit të Vladimir Putinit, Clarke tha se një nga sinjalet që duhet vëzhguar është besimi i qytetarëve te sistemi financiar.
“Rusët nuk besojnë në sistemin bankar”, tha analisti, duke shtuar se po vihet re një humbje besimi që mund të ketë pasoja më të gjera.
Sipas Clarke, shqetësimet lidhen edhe me situatën e kompanisë Wildberries, e konsideruar si një prej gjigantëve rusë të tregtisë online. Ai u shpreh se kompania ka një nivel të lartë borxhi, një pjesë e konsiderueshme e të cilit lidhet me bankën VTB.
“VTB mund të falimentojë nëse Wildberries falimenton”, deklaroi Clarke, duke paraqitur skenarin e tij për rrezikun që problemet e një kompanie të madhe mund të transmetohen në sistemin bankar.
Analisti pretendon se pasiguria ka bërë që qytetarët të mbajnë gjithnjë e më shumë para jashtë bankave, duke përdorur shprehjen se rusët po “mbushin dyshekët me para të gatshme”.
Sipas tij, një tjetër frikë është mundësia që autoritetet ruse të ndërhyjnë te depozitat bankare për të financuar luftën.
“Nuk e di sa realiste është, por është një frikë mes shumë rusëve të klasës së mesme se llogaritë e tyre bankare mund të bastisen nga një lloj veprimi dërrmues qeveritar”, tha Clarke.
Komentet vijnë në një periudhë kur Ukraina po intensifikon sulmet ndaj objekteve strategjike dhe energjetike brenda Rusisë. Presidenti ukrainas Volodymyr Zelensky ka deklaruar se goditjet ndaj rafinerive synojnë t’i heqin miliona të ardhura asaj që ai e quan “makineria e luftës së Putinit”.
Megjithatë, paralajmërimet për një kolaps të mundshëm bankar dhe përdorimin e depozitave për luftën janë vlerësime dhe skenarë të paraqitur nga Clarke, jo zhvillime të konfirmuara.
