Bllokohen mbi 100 mijë euro të padeklaruara në kufi, të cilat kishin hyrë në vendin tonë nga aeroporti “Nënë Tereza” në Rinas.
Policia e Sarandës thotë se gjatë kontrolleve të ushtruara për parandalimin, evidentimin dhe goditjen e paligjshmërisë, si edhe si rezultat i shkëmbimit në kohë të informacionit me Policinë Kufitare të Rinasit, bëri shoqërimin e francezit R. Ch., 70 vjeç.
Shoqërimi i të moshuarit u bë pasi gjatë kontrollit, i janë gjetur 106 890 euro dhe 102 dollarë.
Rezultoi kishte hyrë në Shqipëri nëpërmjet aeroportit të Rinasit dhe nuk kishte deklaruar shumën e të hollave në kufi, sipas ligjit dhe në momentin e gjetjes së shumës së parave nuk dispononte dokument me vete për të justifikuar burimin e tyre.
Nën drejtimin e prokurorisë, u kryen veprimet procedurale, u bë sekuestrimi i shumës së parave dhe shtetasi R. Ch., u procedua penalisht në gjendje të lirë.
Ai akuzohet për veprat penale “Mosdeklarimi në kufi i të hollave dhe i sendeve me vlerë” dhe “Pastrimi i produkteve të veprës penale ose veprimtarisë kriminale”.
g.kosovari
