Ndonëse ishte viti 2008 dhe kishte mbi një dekadë që kishte kaluar viti i mbrapshtë i ’97-ës atë 6 mars banorët e kryeqytetit përjetuan të njëjtën frikë e panik.
Ishte Ilir Paja, atë kohë 35 vjeç që ngriti më këmbë policinë e Tiranës që iu vu pas për ta arrestuar pasi një grup efektivësh të policisë kriminale kishin arritur ta identifikonin ndërsa lëvizte në kryeqytet. Ilir Paja akuzohej për disa vepra penale të rënda të kryera në Gjermani e Itali, vende që e kishin shpallur në kërkim.
Gjatë operacionit që nisi tek zona e Brrylit dhe përfundoi tek ish-farmacia 10, Ilir Paja plagosi efektivin Blendi Haxhimihali dhe u plagos edhe vetë. Deri aty kishte arritur 35-vjeçari sa për t’i ikur policisë, i kishte dhënë mbrapsht makinës duke e futur efektivin Haxhimihali poshtë makinës së tij me gjithë motor.
Më pas tentoi të kalonte në anën tjetër, duke u përplasur me një urban të unazës, e duke marrë fund kështu edhe arratia e tij. Ishte pikërisht kjo ngjarje që e futi në burg në Shqipëri, pasi u dënua me 16 vjet burg.
“BalkanWeb” risjell sot pamjet tronditëse të operacionit të bujshëm të siguruara nga arkiva e “GazetaShqiptare”, ku shfaqet tmerri i asaj dite. Një motor përtokë i marrë para nga një makinë, polici i shtrirë dhe i rrethuar nga kolegët në pritje të ambulancës, xhama të thyer, gjak e plumba. Një grumbull i madh njerëzish kureshtarë, forca policie. Protagonisti i historisë i shtrirë në barelë i rrethuar nga mjekë e infermierë./Balkanweb/a.m.
