Personi në foto është viktima Vladimir Murrizi, i cili u vra dhe u gropos nga kushëriri i tij, pasi u zunë duke u sharë nga gratë.
Më pas, autori vjen dhe bën kallëzim në Policinë e Fierit për “zhdukjen” e kushëririt të tij, bashkë me babain e këtij të fundit.
Por policia zbulon gjithçka dhe arrestoi si autor të dyshuar të krimit shtetasin Denis Zaka.
Sipas Policisë, dy kushërinjtë ishin emigrantë në Greqi dhe punonin si çobanë me dy stane të ndryshme.
Ngjarja ka ndodhur mbrëmjen e 3 gushtit rreth mesnatës, ku viktima, Vladimir Murrizi, 26 vjeç, i ka kërkuar kushëririt të tij bashkëmoshatar, Denis Zaka, që ta ndihmonte për të vjedhur një frezë, që shërben për punimin e tokës.
Dy të rinjtë para se të niseshin, kanë ndaluar në një lokal, ku kanë pirë dhe rrugës kanë nisur të debatonin.
Në saj edhe të dëshmisë së dhënë më pas nga i dyshuari, Murrizi i ka thënë kushëririt se gruaja e tij nuk ishte e ndershme, duke bërë që dhe ky i fundit t’i kthehet me të shara, po për gruan e tij.
Sipas autorit, gjatë zënkës, Vladimir Murrizi ka marrë një shufër hekuri dhe e ka qëlluar atë. Pas kësaj, ai e ka goditur me thikë Murrizin, duke e lënë të vdekur.
Më pas, për të fshehur gjurmët, ai e ka varrosur kushëririn në një përrua. Pas krimit të rëndë, 26-vjeçari Zaka ka ardhur në Shqipëri te familja, pasi këtu kishte edhe gruan. Bashkë me të duhej të vinte edhe kushëriri Murrizi.
Për këtë shkak, babai e ka pyetur se pse nuk kishte ardhur djali i tij, Vladimiri, por Zaka i ka thënë se atë e kanë vrarë në Greqi, pa specifikuar më tej.
Dje Mersin Murrizi, 59 vjeç, ka shkuar në Polici dhe ka kallëzuar se djali i tij, Vladimir Murrizi, 26 vjeç, është vrarë në Greqi, duke çuar si dëshmitar Denis Zakën, kushëririn e parë të të birit.
Gjatë marrjes në pyetje, i riu ka dhënë dëshmi kontradiktore, derisa i gjendur para një situate të tillë ka treguar krimin dhe vendin ku kishte fshehur kufomën në Greqi.
“U zumë, pasi u shamë nga gratë. Më qëlloi me një shufër hekuri, duke më shkaktuar dhimbje fizike. Kjo ma çoi gjakun në tru dhe nxora thikën që mbaja me vete dhe e godita.
S’di si ka ndodhur, më hipi gjaku në kokë. Nga frika e fsheha trupin në përrua, por kur u ktheva në Shqipëri dhe babai i tij më pyeste për djalin, unë i thashë që e kishin vrarë në Greqi, pa dhënë shpjegime”, ka thënë ndër të tjera autori i dyshuar në polici.
Panorama/d.i.
